Forlagssjef Håkon C. Hartvedt og ein glad Gunnar Ingebrigtsen under gårsdagens boklansering. Foto: Terje Koløen.

Gunnar Ingebrigtsen var eit einaste stort smil då boka om han, «Eg gjer meg aldri!», vart lansert hos Sunnbok på Leirvik i går.

Så selde boka og svært bra. Sjølv om det òg var greitt sal på dei andre to bøkene som vart lansert i går, «Start dagen med eit smil, så er det overstått» og «Frå Oasen», var det tydeleg at det først og fremst var boka til Gunnar folk kom for å kjøpe.

Lillian Kårbø kom eins ærend frå Sagvågen til Stord, både for å kjøpe bok – og gi Gunnar blomar i samband med lanseringa.

Gunnar vart og gjort vidare stas på: Vener hadde kjøpt han to nye frelsesarmeskjorter, og frå forlaget fekk den glade frelsessoldaten ein spildrandes ny uniform.

– Det måtte til, for som Gunnar seier har han slite ut «ei grøde med uniformer og offiserar» – og at han kjem til å slite ut denne og, er me ikkje i tvil om, seier forlagssjef Håkon C. Hartvedt til fitjarposten.no

I morgon laurdag vert det signering på Fitjar. Først hos Larsen Multihandel, så hos Thea Træet.

Ein glad Gunnar Ingebrigtsen signerer. Foto: Terje Koløen.
Gunnar leverer bok til Øystein Steinsland. Sistnemnde kjem med bok om ein månad. Foto: Terje Koløen.