Me har prøvesmakt på det største og beste matfatet i Fitjar, hos Engesund Fiskeoppdrett.

Rett utanfor stovedøra vår – knapt 10 minutt med båt frå Fitjar sentrum – ligg ein av dei største matprodusentane i Fitjar. Me har vore med dei svært så matkunnige Sissel Jørgensen og Martin Nysæther på besøk hos Engesund Visningssenter for å sjå kva me kan venta oss frå den kanten under Fitjarfestivalen neste helg.

Ute mot Selbjørnsfjorden har Engesund Fiskeoppdrett to lokalitetar med matfisk. Dagleg leiar Svein Eivind Gilje viste oss rundt ute på anlegget, og visningsvert Ida Helene Hvitsand serverte den lekraste laksemiddag me har smakt.

På Dyrholmen vest har dei 220 000 regnbogeaure som ventar på å bli slakta i haust. Visningssenteret ligg på Dyrholmen øst, der seks merdar er fulle av glade laksar på rundt 350 gram. Dagleg leiar Svein Eivind Gilje fortel at fisken har klart seg bra i sommar, sjølv om 20 grader i sjøen er i varmaste laget.

Regnbogeauren er komen opp i ein gjennomsnittsstorleik på rundt tre kilo, så det vil bli rundt 700 tonn fisk når den er ferdig slakta i desember. Når ein reknar 200 gram fisk per middag, skjønar me at det blir mange middagar til saman. Rask hovudrekning gir då 3,5 millionar delikate auremiddagar!

Både laks og aure har eit naturleg potensial til å veksa fort, seier Svein Eivind Gilje. Fisken drar ut i havet for å feita seg opp før han skal opp i elvane og gyta. Då gjeld det å bli stor og sterk på kortast mogleg tid, for det er dei sterkaste hannfiskane som slepp til hos hofiskane.

Engesund Visningssenter vil ha stand i enden av bodgata under Fitjarfestivalen. Her vil dei servera lakseburgar, kaldlakstallerken og lakselollipop (laksepinne). Me fekk servert kaldlakstallerken som består av sashimi med sesamfrø, pesto potetsalat, suede-kokt laks (kokt i vakuum) flatbrød, gravlaks, sennepssaus, varmrøykt laks, ceviche og sylta laks. Utan å ta munnen for full kan me slå fast at betre mat finn du neppe. Denne maten toler dommen frå den mest kresne gane!

Til å utvikla rettane har dei fått hjelp av den kjende kokken Michael Reddington, som har ei lang merittliste både frå Irland, Sveits og Frankrike. Han har vore chef i 10 år på Radisson Hotel, og arbeider i dag på Norsk Sjømatsenter i Bergen. Reddington har utvikla sju-åtte rettar spesielt for Engesund. – Både gravlaksen, syltelaksen og den varmrøykte laksen er laga på ein heilt spesiell måte, slik at smaken er karakteristisk for Engesund, seier han.

Jobben for Engesund Visningssenter har han sett spesielt pris på, etter det me forstår. – Laksen og auren deira er spesielt god, seier han, der ute går dei meir for kvalitet enn kvantitet!

Me kan slå fast at resultatet har blitt bra, og ser fram til nye smaksprøvar frå det store matfatet i Engesund.