A-laget til Fitjar sleit seg til 5-2-siger og tre poeng mot Fusa i ein spelemessig dårleg kamp måndag kveld.

Det var Fitjar som kom best i gang i kveldens kamp, og allereie etter to minutt gleid storscorar Thomas V. Waage fint igjennom Fusa-forsvaret. Men assistentdommar Stig Faraas vinka han korrekt av for offside. Etter fem minutt kunne Fitjar på nytt ha gått opp i leiing, då Torbjørn Korsvik kom til ei pen heading etter corner. Men Fusa-keeperen var med på notane.

Etter den fine innleiinga var det litt mot spelets gang at Fitjar måtte sjå gjestene gå opp i leiing 1-0. Fusa-spelarane fekk god plass mot eit passivt Fitjar-forsvar, og etter fleire fine tilbod kunne Jarle Andresen setja ballen sikkert i mål. Det verka som om Fitjar-spelarane ikkje heilt takla denne baksmellen, og me fekk sjå mykje dårleg spel. Fusa vann dei fleste andreballane, uvisst av kva grunn. Heldigvis for heimelaget lukkast dei med eit flott angrep på høgresida etter 22 minutts spel. Leif André Tangen i kjent stil kom framover i stor fart og fekk lagt inn framfor mål. Der heada ein aggressiv Thomas V. Waage sikkert i mål. Men den som hadde trudd at scoringa markerte eit vendepunkt, tok feil. Det dårlege spelet heldt fram, med mange feilpasningar og løp som ikkje stemte med pasniningane framover.

I andre omgang blei det litt betre for Fitjar. Øyvind Fykse Lie gav Fitjar 2-1 i byrjinga av omgangen, og litt etter la Thomas V. Waage på til 3-1. Dermed skulle kampen vera avgjort, men hardt kjempande Fusa kom tilbake og reduserte til 2-3 ved Arnt Ove Lundarvik. Eit relativt talrikt heimepublikum måtte venta heilt til det 75. minutt før kampen blei endeleg avgjort. Jan Åge Tislevoll tok ballen med seg på venstresida og gjekk forbi det meste som var av blåtrøyer frå Fusa, før han sette ballen sikkert i mål. Dagens finaste mål fekk me sjå om lag fem minutt før slutt. I kjent stil tok Mats Brakedal med seg ballen innover i banen utanfor 16-meteren. Skotet frå 17-18 meter gjekk via eit Fusa-bein, og ein «vicious deflection» gav oss eit flott mål over ein sjanselaus Fusa-keeper.

Fitjar-kaptein Øyvind Fykse Lie var ikkje fornøgd med spelet, men godt fornøgd med at det blei siger på ein dårleg dag. Trenar Kjell Træet er einig i at spelet ikkje var det beste han har sett i år. – Me gjorde det vanskeleg for oss sjølve i dag, seier han, men me må vera fornøgde med denne slitesigeren og tre nye poeng på ein dag då me ikkje fekk spelet til å gli.

No ser Fitjar-trenaren fram til toppkamp mot Bremnes førstkomande torsdag. Ein kamp som faktisk kan bringa Fitjar heilt til topps på tabellen i 5. divisjon.