Fitjar sleit seg til ein 2-1-siger mot innsatsvillige og fysisk sterke halsnøybuar i sesongens første seriekamp på heimebane.

Gjestene viste seg akkkurat så sterke og innsatsvillige som ein kunne venta då det bar til dyst på kunstgraset fredag kveld. Fitjar fekk aldri vist det flotte pasningsspelet som me såg på Askøy for ei veke sidan. Halsnøybuane kjempa heimelaget ut av stilen frå første spark på ballen, og dominerte første omgang.

Halsnøy kom til fleire farlege sjansar, og Fitjar kom ikkje skikkeleg i gang. Heimelaget var heldig som klarte å halda unna for innsatsfylte gjester frå Halsnøy. Men ein god keeper, Oddgeir Træet, og godt samspelte midtstopparar, Martin H. Vestbøstad og Nils Ingard Tislevoll, reid stormen av.

Me noterte knapt ein einaste sjanse for heimelaget før etter 35 minutts spel, då Mats Brakedal avslutta frå 15 meter etter eit flott raid. Og dei siste 10 minuttane av omgangen fekk Fitjar endeleg litt meir grep om ballen. Leif André Tangen kom på fleire fine raid på høgresida, slik me såg så ofte i fjor. Og etter 43 minutts spel bomma Halsnøy-keeper Eirik Eikeland på eit av desse flotte innlegga, og ballen hamna hos den største av alle måltjuvar frå Fitjar. Thomas V. Waage kunne plassera ballen sikkert i mål, litt imot «spelets gang».

Fitjar var nok litt heldige som kunne gå til pause med 1-0, men i andre omgang var dei fullt på høgd med gjestene sine. I byrjinga av omgangen hadde Halsnøy dei farlegaste sjansane, blant anna ei farleg heading ved kaptein Erlling Hansen. Men etter 15 minutt skaut Thomas V. Waage i stolpen, og etter kvart fekk me sjå fleire fine skotforsøk ved Jan Åge Tislevoll. På slutten av kampen pressa Halsnøy hardt på for utlikning, og Fitjar kunne auka til 2-0 på ei kontring. Thomas V. Waage fekk ballen på midtstreken og la fint vidare til Mats Brakedal, som kunne avansera mot mål. Han let seg ikkje uroa av ein halsnøybu som kom halsande bak, og sette ballen fint forbi keeper Eirik Eikeland.

Dermed burde kampen vore avgjort, men Fitjar-spelarane høyrde ikkje instruksane frå hjelpetrenar Ketil Fykse om å roa ned og ikkje sleppa gjestene til. Halsnøy gjekk rett frå avspark i angrep, og fekk straffe etter ein hands på Emil Fitjar. Halsnøy-kaptein Erling Hansen klarte ikkje å overlista Oddgeir Træet i første forsøk, men Fitjar-keeperen måtte gi retur, som Hansen sette kontant i mål. Med 2-1 ebba kampen ut, ein kamp som lett kunne ha vippa andre vegen. Fitjar-spelarane bør vera godt fornøgde med siger på ein litt dårleg dag.

Etter dagens siger ligg Fitjar på andreplass i 5. divisjon bak Lysekloster 2, som vann 5-0 mot Rosendal fredag kveld. Neste kamp er borte mot nettopp Rosendal, laurdag 27. april.