A-laget til Fitjar berga eitt poeng heime mot Bremnes etter at Jan Åge Tislevoll utlikna til 1-1 i sluttminutta.

Møtet med Bremnes blei ikkje den festframsyninga fotballfolket hadde håpt på. Ingen av laga viste stor fotball, og kan berre delvis skulda på ei grasmatte som blei våtare og våtare utover i kampen.

Bremnes viste tidleg kvifor dei ligg så langt nede på tabellen. Dette er eit av dei svakaste laga Fitjar har møtt i år, og i byrjinga såg det ikkje ut til å vera noko trugsmål mot nye Fitjar-poeng. Sjølv om enkelte Fitjar-spelarar var altfor dårleg skodde, og minte oss om den velkjente Bambi på isen, hadde heimelaget dei fleste og beste sjansane.

Henrik Raunholm Kjelling skaut over frå vel 16 meter, og både Torbjørn Korsvik og Thomas V. Waage hadde gode tilbod frå kort hald. På utruleg vis greidde Bremnes-keeper Johannes Stokkens og forsvaret hans å avverja. Og etter kvart kom Bremnes litt meir med, angriparane deira pressa høgt og gjorde vaklevorne Fitjar-spelarar unødvendig usikre. Når dei begynner å snu ryggen mot motstandarane sitt mål og spela bakover på banen, liker me dei ikkje.

Dermed fekk Bremnes spela seg til fleire sjansar. Først gjekk ballen i krysset etter skot frå kort hald, og etter knapt ein halvtimes spel gjekk dei opp til 1-0. Bremnes braut på Fitjar sin banehalvdel, og Sigurd Bråthen fekk lett spel mot eit forsvar i ubalanse. Han fekk dra seg heilt fri på 12-14 meter hald, og plasserte pallen sikkert i mål bak Oddgeir Træet. Kampen heldt fram med eit visst ovetak for heimelaget, og me noterte eit godt langskot av dagens Fitjar-spelar, Helge M. Træet, før Bremnes kunne gå til pause med ei litt heldig leiing 1-0.

Etter pausen kontrollerte Fitjar det meste, og pressa på for utlikning. Badi Hurashi fekk betre kontakt med underlaget etter kvart, og etter 10 minutt la han fint inn framfor mål. Der var Thomas V. Waage i veldig god posisjon, men måtte sjå at ein medspelar heada ballen vekk framfor nasen hans. Utover i andre omgang kom Fitjar til eit utal sjansar, utan å lukkast. Før heilt på slutten, då midtstoppar Jan Åge Tislevoll tok ballen med seg frå midtbanen og skaut sikkert i mål frå rundt 16 meter.Til stor jubel for våte og utolmodige medspelarar!

Heilt på slutten kunne Fitjar sikra seg alle tre poenga, på fleire fine tilbod. Men slik som kampen utvikla seg, må dei vera rimeleg fornøgde med å berga eitt poeng. Spelemessig var nok dagens kamp eit lite tilbakesteg etter den fine bortekampen i Bergen i førre veke. Dei makta ikkje å hekta av Bremnes i botnen av tabellen i 4. divisjon, og kan få dei andre botnlaga ubehageleg nær dersom desse laga vinn kampane sine denne serierunden.