Tre juniorar frå Fitjar reiser til Vikedal denne helga for å vera med på den siste runden i årets bilcrossesong.

I morgon er det klubbløp og avslutning i NMK Vikedal Cup. Her stiller første års junior Jonas Heggøy opp saman med dei to meir rutinerte juniorane Jonas Koløen Lønning og Gisle F. Aarbø. Størst voner har som vanleg Gisle, som ligg på ein fin 6.-plass i cupen før siste runden.

Men han har nok endå meir å henta søndag, når siste runden i vestlandsmeisterskapen går av stabelen. Om me går inn på nettsida til NMK Vikedal finn med ein link til stillinga i vestlandsmeisterskapen før siste runden. Her ser me at Gisle ligg på ein finfin 5.-plass med 62 poeng, berre eitt poeng bak Robert André Heimvik på 3.-plassen.

– Dette går det absolutt an å gjera noko med, seier nestor i Fitjar Racing Team, Ole Vidar Helland.

Gisle fortel at bilen hans er klar til dyst. Han har ikkje vore nøydd til å gjera noko spesielt med Sierra-en føre siste runden, og reknar med at bilen fungerer. Han skal berre leggja på eit par nye framdekk, med litt meir mønster. Elles ser han ikkje mørkt på det om det blir dårleg vêr og litt våt bane. Gisle plar gjera det godt på vått føre.

Ein som ikkje er like glad for regn i vêrmeldigane, er kompisen Jonas K. Lønning. Sist han var i Vikedal på trening, var det altfor mykje væte på banen. Motoren begynte å fuska etter at han hadde fått fukt i innsuget. Han har ikkje vanleg luftfilter, berre gitter for å unngå steinar. I denne bransjen er dei nemleg redde for å få for lite luft. Målet til Jonas, etter ein litt mager sesong, er først og fremst å komma til mål i alle rundane.

Både Jonas K. Lønning og Gisle Aarbø er ferdige i juniorklassen etter sesongavslutninga i helga. Neste år har Fitjar Racing Team berre ein mann att i bilcross junior, nemleg Jonas Heggøy. Han har gjort det bra i år, med ein fin 9.-plass blant 21 startande i det første løpet i vår. Han stiller minst like skarpskodd til neste år, og gler seg til å få kjøra alle løpa.

Dei to andre kompisane går over til seniorklassen; også der er reglane dei same. Men mange nye, tøffe motstandarar møter dei. Så vidt me forstår, ser dei fram til å kjempa mot tigrar, ulvar og brølande løver!