– Det har vore ein aktiv o-sesong lokalt, og for første gong har det vore trening eller Fitjarkarusell-løp kvar onsdag heile sesongen, kan vi lese på FIL si heimeside.

Me får vidare vite at deltakartalet på Fitjarkarusellen i gjennomsnitt har vore rundt 25 personar og litt færre på treningane.

Under sesongavslutninga i går vart det delt ut over 20 statuettar til unge og lovande o-løparar, og turorienteringsmerke til over 20 personar under 15 år.

85 registrerte
Totalt er det registrert 85 personar i Fitjar IL si turorientering dette året. 

På dei 55 postane som var fordelt på Midtfjellet, Øvrebygda, Sælevik og sentrum/Rossneset er det i gjennomsnitt litt over 39 klipp. «Stolpejakta», som òg er ein del av turorientering, har 79 registrerte deltakarar og totalt 1038 klipp på dei 15 postane – altså litt over 69 klipp i gjennomsnitt.

Statistikken for deltaking på løp utanfor Fitjar er ikkje så oppløftande, men med godt arbeid lokalt vil dette truleg bli betre på sikt. Samarbeid med andre klubbar om o-troll-leirar eller turar til større løp er òg viktig for arbeidet vidare. Mange av dei som har vore med i år er veldig unge, og har foreldre eller andre som er med rundt løypa. Foreldra si rolle er for mange viktig heilt opp i 10-12- årsalderen, men det er òg ein unik sjanse for foreldra til å gjera noko saman med borna sine.

Onsdagssprint
Frå 12. november blir det «Onsdagssprint» i Rossneset annankvar onsdag kl. 18.00. Då er det berre å ta med hovudlykt og gå ut på enkel postjakt i mørket.