På Fitjargarden blei dei siste gulrøtene hausta i dag, noko som er rekordseint.

Fitjarposten var med Mette Lambach ut i kjøkenhagen hennar torsdag føremiddag. Då spadde ho opp dei siste gulrøtene sine. – Eg har aldri hausta gulrøter så seint, seier Mette. Det har me ikkje vondt for å tru – det er meir vanleg å hausta gulrøter om hausten.

I den vesle kjøkenhagen på rundt 100 m2 rett framfor huset på Fitjargarden har Mette dyrka kålrabi, brokkoli, persille og gulrot siste året. Både kålrabien og brokkolien har Mette hausta for lengst. På grunn av den milde vinteren har både persillen og gulrøtene blitt ståande til i dag.

Mette er godt fornøgd med jorda i kjøkenhagen. – Her blir gulrøtene fine, seier ho, utan at dei blir for krokete. Rett nok er det varierande storleik på gulrøtene i dei to bøttene som ho har plukka i dag. Men gode er dei, noko Fitjarposten sin utsende kan stadfesta.

No dekker Mette til gulrøtene med plastbosar, slik Tore Sigurd har sagt. Slik unngår ho at gulrøtene blir mjuke og lite delikate. Og dermed har ho ferske og fine gulrøter i lang tid framover.