Fitjar ad-hoc-ensemble førebur seg til temakveld i Fitjar kyrkje.

Denne veka blir det ny temakveld i Fitjar kyrkje, og denne gongen lokkar dei ivrige arrangørane med Fitjar ad-hoc-ensemble.

– Me ser fram til å høyra den lokale gruppa med dugande musikarar på temakveld på Fitjar! skriv Eli Simonsen i temakveldgruppa.

Bandet har spela saman i om lag 10 år – med litt skifte av mannskap undervegs.

Ad-hoc kjem frå latin og tyder «for dette høvet». Dei har ikkje faste øvingskveldar, men øver når dei har oppdrag. På det meste har det gått bortimot eit år mellom samlingane. Dei er sporty og kastar seg rundt når dei får spørsmål om å syngja og spela.

Dei siste åra har Osternes Mannskor nytta dei som husorkester til dei mange kabaretane.

– Ingen skal plassera oss i bås når det gjeld musikksjanger, seier Harald Rydland, me likar å spela mang slags musikk, for eksempel viser, jazz, folketonar, gospel, salmar og dansebandmusikk. Dei fleste av oss kan lite eller inkje om notar og musikkteori, men saksofonisten vår har heldigvis meir å bidra med her.

På temakvelden i Fitjar kyrkje torsdag 28. mars vert desse å høyra:

Guris Refvik, song

- Annonse -

Martin Hatlevik, song og gitar

Heine Helland, bassgitar og banjo

Ole Christian Ottestad, saksofon og tuba

Terje Træet, trommer

Harald Rydland, piano og trøorgel.

Musikkvalet på temakvelden vil spenna vidt. Dei lovar at ikkje noko av det dei framfører er ukristeleg. Dei som kjem, vil få høyra ei god blanding av viser, gospel, salmar, åndelege songar og folketonar. Dei vil og ha forsamlinga med på fleire allsongar.

– Me ser fram til ein triveleg kveld med mykje speleglede i Fitjar kyrkje, skriv Eli Simonsen på vegner av temakveldgruppa.