Roger Rræet smiler lurt der han sit på Videoen saman med lokale bridgeheltar på Fitjar. Foto: FP-arkiv/KR.

Vår fremste bridgespelar, Roger Træet, har nytta mørke haustkveldar til å markera seg positivt i konkurranse med sterke bridgekort frå fjern og nær.

Roger Træet har i fleire år markert seg som den klart beste bridgespelaren i mils omkrins. Og han har bak seg to sterke prestasjonar i haust, først i Maritime Cup i Haugesund, og så på Austlandet.

Sist helg var han på Dal rett nord for Gardermoen og spela første runde av seriemeisterskapet i brigde. Her spelar Roger i 2. divisjon, saman med kompisane sine. Han er ikkje heilt fornøgd med utfallet, etter den første helga ligg laget hans på 5.-plass samanlagt.

Seriemeisterskapet blir avgjort i Bergen første helga i februar. Då skal dei spela resten av kampane, slik at dei til saman har spela elleve kampar. Det er tolv lag med i andre divisjon. På sitt beste er Roger og kompisane hans i stand til å slå laga som spelar i 1. divisjon. Men på det jamne høyrer dei nok heime i 2. divisjon, vedgår Roger. Han legg til at den utflytta fitjarbuen Tore Bårdsen, spelar 1. divisjon, saman med lagkameratar frå Stavanger.

Helga 6. og 7. oktober stod Roger for ein endå sterkare prestasjon, i Haugesund. Her gjekk turneringa Scandic Maritim Cup av stabelen med deltaking frå godt over 30 lag. Eitt lag frå Oslo-området og fleire lag frå Bergens- og Stavanger-området stilte opp, men ingen var betre enn laget til vår mann.

Med på laget «Bromlebassane» var, i tillegg til Roger, Stig Gamlemshaug, Helge Hantveit og Finn Fyllingslid. Dei starta godt, og var heilt åleine i føringa til det stod att berre ein kamp av totalt 14. Denne tapte dei, og enda på 666 poeng til saman. Det heldt til delt førsteplass.

I eit av dei første spela imponerte Roger både medspelarar og motspelarar med eksepsjonelt god speleføring, og han greidde å vinna tolv av 13 moglege stikk utan at motstandaren kunne hindra det. Blant dei som let seg imponera, var norgesmeister og europamester, bridgejournalist og skribent Nils Kvangraven.

Sjå kva han skriv på nettstaden Kvangraven.no.

Roger minner om at han spelar bridge på «Videoen» kvar onsdag, saman med lokale bridgeheltar. Det er plass til fleire, og han oppmodar folk om å møta opp. Han kan lova opplæring til dei som treng det, og understrekar:

Alle er velkomne!