Roald Tellnes stiller ut på Fitjar.

I morgon, laurdag 1. desember, vert det utstillingsopning med kunstverk av Roald Tellnes i Galleri Losjen.

Det er kultursjef Bente Bjelland som skriv dette i ei pressemelding.

Varaordførar Agnar Aarskog opnar utstillinga. Marit Digernes les dikt, og Jarle Langeland kjem med musikalsk innslag. Kultursjefen lovar og lett underhaldning.

Ho minner om at delar av utstillinga er for sal.

 

Roald J. Tellnes har etter fullført utdanning vore bosett i Karmøy kommune.

Han arbeider hovudsakleg med grafikk og skulptur, men bruker også andre kunstnarlege teknikkar. Han lærte broncestøiping i København hos Leif Jensen og grafiske teknikkar av Inge Rotevatn, Michael Rothenstein og Anthony Benjamin.

Uttrykksforma  hans er høgst personleg. Han bruker i grafikken ein sjeldan og spesiell teknikk, materialtrykk der metallbitar, netting, plast og andre gjenstandar blir brukte som botnmateriale. Kvar enkelt bit blir farga inn separat og trykt under stort press. Dermed blir det gitt ein ny dimensjon til fargegrafikken.

Tellnes har halde separatutstillingar i mange land i Europa, men også i USA, China og Japan. I ”Haganesparken” på Sotra kan du sjå nokre av skulpturane hans, blant andre ”Fiskarbonden” og ”Dei sju muligheter”.

(Kjelde: Roald Tellnes)