– Eg kan ikkje seie anna enn at eg er kjempefornøgd. Det seier Ole Bergesen etter at fitjarrevyen «Heilt i spekje» vart avslutta i går.

Det har han òg grunn til å vere. Sjølv om fitjarrevyen i år hadde sterk konkurranse frå ein god revy på Stord, nådde ein opp til eit totalt, glimrande publikumstal på rundt 4000.

Ole er òg svært nøgd med ensemblet og musikarane.

– Eg visste jo kven eg hadde med meg på laget. Eg ser på Ina Breivik som ein av Noregs aller beste revyskodespelarar, og eg veit kva Petter Aagaard og den lokale gjengen står for. Dessutan var revyorkesteret heilt fantastisk,  smiler Ole Bergesen.

Revyen i år hadde stor lokal forankring, og nesten alt var sjølvprodusert. Ole forklarer at dei jobba mykje i forkant, ikkje minst med tekstane og med å sy revyen saman.

Revygeneralen kan likevel ikkje kvile på noko slag laurbær. Allereie på onsdag og fredag i komande veke skal han vere med på å setja opp to show på Revyfestivalen på Høylandet.