REMA 1000 vil byggja ein fullsortimentsbutikk på 1300 kvadratmeter i lokala der JKS Bil og Deler AS no held til. Butikken ventast å vera klar til hausten.

-Den nye butikken vil fylla området der FK-butikken og Bensinstasjonen ligg i dag, og vel så det. I tillegg skal det koma stor parkeringplass. Bensinstasjonen og verkstaden vil bli bygt opp att lenger aust i same området, opplyser regionsdirektør for REMA 1000, Eirik Fuglum, til fitjarposten.no

Han fortel vidare at når dei satsar på Geirmund Aga som kjøpmann for denne butikken, så er det fordi han har gjort ein kjempekarriere i REMA 1000-samanheng. Han har òg fullført REMA 1000 sin eigen kjøpmannskole med godt resultat.

-Eg ser på dette som ei gladsak for fitjarbuen. Tala me sit med syner at det er stor handelslekkasje frå Fitjar. Ein ny REMA-butikk vil truleg stoppa noko av denne lekkasjen, meiner regionsdirektøren.

Geirmund Aga er for tida assisterande butikksjef i REMA 1000 i Haugesund, og ser fram til å starta i ny jobb på Fitjar. Han fortel vidare at REMA 1000 har eit franchise-opplegg som gjer at han som kjøpmann bestemmer sjølv over både drift og kva han vil gjera ut av butikken.

-Men det er bak kulissane. REMA 1000 på Fitjar vil bli som alle andre fullsortements-REMA 1000-butikkar, opplyser Aga.