Fitjarjenta Marie Ervik Husøy (16 år) er AFS-student i Latin Amerika. I ein e-post til fitjarposten.no fortel ho om mange rike opplevingar i lag med andre utvekslingsstudentar og vertsfamilien sin. Marie har lagt ved to bilete.

Her kan du lese Marie sitt reisebrev:

«Eg har alltid hatt lyst å oppleva verden. Det er mange år sidan eg byrja drauma om eit år i utlandet og når søskenbarnet mitt tok eit år i Frankrike, bestemte eg meg for at dette skulle eg og klare. Organisasjonen var AFS, og etter eit titals søknadar og papirdokument fekk eg endelig svarbrevet mitt. Datoen var 3.Desember, bursdagen min, ein stor kvit konvolutt med navnet mitt på kom i postkassa. Eg fiska opp eit papir der det stod at eg hadde fått plass i programmet i den spansktalande Dominikanske Republikk! Om eit snaut halvår skulle eg sitte i eit framand hus i hjertet av Karibien. Tida før avreise gjekk utrulig kjappt og før eg visste ordet av det sto eg å trippa på Gardemoen, den 24.August klokka 06:00, spent som berre det. Litt betryggande var det at dei sju andre studentane frå Norge var minst like spente som meg, samstundes som me passa på kvarandre under heile turen. Rundt 30 timar seinare var me framme i Santo Domingo, hovudstanden i den Dominikanske Republikk kor ein del av studentane som skulle til andre stadar i landet, tilbringte natta. Den klamme lufta som traff andletet mitt når eg kom ut av flyplassen kjem eg aldri til å gløyma. No sit eg her i Constanza, eit herlig fjellparadis, hos den beste familien eg kunne fått. Det er ein stor familie på fire søsken, fire hundar, stor gård med utallige dyr og i tilleg delar eg rom med ein utvekslingsstudent frå Italia! Eg stortrives og har allereie fått oppleva mykje av kulturen her på berre ein drøy månad. Eg går på spansk skule, familien snakkar spansk og det er svært få i landsbyen min som snakkar engelsk. Mykje har eg lært, men fortsatt er eg veldig ustø på spansktalen men med litt peiking og nikking har det gått veldig fint. Frå Norge er det utrulig kor stor forskjell samfunna har, det går ikkje ann å forklara, det må berre opplevast. Alt frå å vaske hår til klasserom er forskjellig. Her vaskar ingen håret sitt heime, alle går på salongen! Og her er det ingen som kjempar for kva studentane har rett på i skulen, me sit 33 elvar samanknepte i eit rom på 15x10m utan aircondition! Men det er slik kulturen er, og eg er heldig som får oppleva ein heilt ny «verden». Det hadde aldri vert det same å reise her som turist, langt ifrå. Eg har både fått kjenne kulturen på kroppen og på humøret. Heile oppholdet er som ei berg- og dalbane når det gjelder humør, og kiloane her rasar på når ein berre et loff, drikk leskedrikkar og et mektige middagar som er reine buffeeten.    Eg valgte å reisa som utvekslingsstudent til den Dominikanske Republikk fordi eg vil læra meg flytande spansk. Dette håpar eg vil opne for fleire mogligheitar innan yrkeslivet og eventuelt arbeid i utlandet. Eg hadde også lyst å møte ein så forskjellig kultur som mulig frå Norge, når eg først skulle reise. Eit utvekslingsår er ikkje berre skule og språk, men utrulig mange aktivitetar i tilleg. Eg har tatt del i 50’års jubileumsgalla for AFS, supriseparty, velkomstcamp, fjelltur til Pico Duarte (3089moh) og over nyttår skal eg på surfecamp, øyehopping, helgecamp på dei sju finaste strendene og meir! Å reise til Kariben er ikkje sikkert eg hadde gjort nokon gong, om eg ikkje greip denne sjansen. Landet grensar til Haiti, som er verdens fattigaste land. Så her er det ein heilt annan kost en i Norge kvar ein får «betalt» for skulegong og får støtte om ein er yrkeslaus eller ufør. Dette er og kjem til å bli ei oppleving for livet og eg vil være styrka på fleire måtar når eg kjem tilbake til Norge. Eg er heilt åleine, har ingen andre bein enn mine eigne å stå på. Familien, vener og kjæreste er savna men om 8 månadar er eg heime på Fitjar igjen så dette er ikkje noko som kan holde meg tilbake. Eg anbefalar alle som tenkjer på eit år i utlandet, om å gripa sjansen. Det er mange mogligheiter og via et par klikk på internett kan du få eit skreddarsydd program for deg.»