Lars Lunde går over mål i suveren stil, men må konstatera at han ikkje kjem under 19 minutt. Foto: Kjetil Rydland.

Regn skal vera bra å springa fort i, og det viste seg under den våtaste Fitjardalten me har opplevd. Lars Lunde frå Stord slo sin eigen løyperekord i herreklassen, og Malene Njåstad frå Gular tok rekorden i dameklassen.

Arrangøren må seia seg nøgd med deltakinga i Fitjardalten, iallfall om me tenkjer på det sure haustveret. Trass i regnet stilte over 130 små og store til start, 47 i konkurranseklassen, 25 i Minidalten og resten i den tradisjonelle turmarsjen. Det var veldig mange unge deltakarar i alle klassane, og innsatsen var det ingen ting å seia på.

Geir Tore Søreide er ferdig med oppvarminga og legg ut på turmarsjen. Foto: Kjetil Rydland.

I konkurranseklassen var 21 år gamle Lars Lunde frå Stord heilt ustoppeleg. Han gjekk i tet frå start, og hadde opparbeidd seg eit forsprang på eit knapt minutt etter to kilometer. Ein av dei som kunne bydd på ein viss konkurranse, var Kim Laitinen, men han måtte bryta.

Etter eit forrykande løp gjekk Lunde over mål på ny løyperekord, heile 34 sekund føre hans eigen gamle rekord. einaste skåret i gleda var at han hadde håpt å koma under 19 minutt. Den unge Stord-løparen seier seg likevel godt fornøgd med løpet. No satsar han på å gå til topps i NM halvmaraton i klassen U23. Og neste år er det EM i 5000 og 10 000 meter i U23 som står øvst på lista.

I dameklassen hadde Nina Aarbø Olsen eit napp i vandrepokalen, men ho blei grundig slegen av Malene Njåstad frå Gular. Nykomaren i Fitjardalten sette ny løperekord med 40 sekund, og var over eit minutt føre den lokale løpardronninga vår. Nina var likevel beste fitjarløpar uansett kjønn og årsklasse, med ein 11.-plass totalt.

På plassen bak henne kom unge Halvor Livastøl Aga. Han slo klart dei to rivalane sine frå Fitjar, Eirik Torbjørnsen og Johannes Sandvik Bø. Med tida 25,31 fekk Halvor andreplassen i 14-årsklassen akkurat eit minutt bak Elias Skålevik frå Ask Friidrett. Sistnemnde er berre 11 år, og er kanskje den som imponerte aller mest under dagens regntunge løp. Me synest ikkje det er nokon grunn til å kimsa av dei unge fitjarløparane.

Den komplette resultatlista for Fitjardalten 2018 kan du lesa på EQ Timing.

I år gjekk 10 % av startkontingenten til «Aktiv mot kreft». Marit Nitter fortalde litt om kva organisasjonen arbeider for under premieutdelinga; opptrening for kreftpasientar er viktig for å kome tilbake i god form etter lang tids sjukdom.

- Annonse -

Bård Inge Bø minner om at i morgon blir det oppsamlingsheat for dei som ikkje fekk med seg Fitjardalten i dag. Sjå Facebook-sida til Fitjar Idrettslag.