Raudfottege på rekkverket ved kunstgrasbanen i går. Foto: Privat.

Ved hjelp av Artsorakelet på Internett var det ikkje vanskeleg å slå fast at det var ei raudfottege lesaren vår hadde sett på kunstgrasbanen i går.

Utan avanserte hjelpemiddel hadde nok gårsdagens insektquiz blitt litt for vanskeleg. Raudfottege er ingen sjeldan skapning, men me går jo ikkje rundt og veit kva alle desse småkryoa heiter.

Å identifisera store og små dyr som me ikkje har sett før, har no blitt svært så enkelt. I alle høve om du får teke eit godt bilete. Det hadde lesaren vår gjort i går, og då me hadde lasta biletet inn i Artsorakelet, var det ingen tvil. Det var 100 % sikkert ei raudfottege.

Artsorakelet åtvarar oss om at resultatet kan vera feil, men når det er eit treff på 100 %, tar me sjansen på at det stemmer. Skjemdump Artsdatabanken.

Me har skrive om denne nye appen som du kan opna i nettlesaren din for å finna ut kva art du har funne. Du kan bruka han både på PC og på mobil, lasta ned biletet og få appen til å finna ut kva planta, fuglen eller dyret heiter. Prøv sjølv!