Klubblokalet på Rydland var fullt av entusiastiske bilsportfans i alle aldrar.

Søndag feira Fitjar Racing Team dei store triumfane sine i sesongen med marsipankake, og ordførar Wenche Tislevoll var heidersgjest.

Som kjent har Fitjar Racing Team hatt ein eineståande sportsleg suksess i årets sesong, med heile tre VM-titlar.

Første bilcrossmeister frå Fitjar

Ailin Vik blei den første kvinnelege vestlandsmeisteren i bilcross nokon gong, då ho vann samanlagtsigeren i juniorklassen. Samstundes var ho den første VM-vinnaren frå Fitjar, og berre nokre minutt etter blei Oliver André Matre den første vestlandsmeisteren i seniorklassen frå Fitjar. Same dagen som Håvard Helland vann VM i rallycross, den største klassen, over 2400 ccm.

Kakefest med besøk av ordføraren

Søndag ettermiddag møttest rundt 30 medlemmer i racingteamet i klubblokalet på Rydland for å heidra dei tre VM-vinnarane. I fremste rekkje blant gratulantane var ordførar Wenche Tislevoll, som fekk smaka marsipankaka som Elisabeth Vågen hadde bakt for høvet.

Dei tre heidersgjestene frå Øvrebygda, Ailin, Oliver og Håvard fekk velfortente godord frå ein annan øvrabygdar, ordførar Wenche Tislevoll. Ho hadde òg med seg ymse gåver til dei tre VM-vinnarane. Til leiaren i Fitjar Racing Team, Ole Vidar Helland, hadde ordføraren med seg ein vimpel frå Fitjar kommune.

– Ikkje gull alt som glitrar!

Ordføraren la ikkje skjul på at ho var imponert over alt sølvtøyet som pryda veggene i klubblokalet til racingteamet.

– Det er ikkje gull alt som glitrar! smilte Ole Vidar, men han legg ikkje skjul på at han er godt fornøgd med årets sesong. Me gratulerer med ein strålande godt gjennomført sesong!

Elisabeth Vågen hadde baka ei nydeleg kake, men dei som leverte marsipanen fekk ikkje fulltreff med klubbfargane.
Håvard Helland er før Oliver A. Matre i køen, og sprettar VM-kaka.
Ordførar Wenche Tislevoll kom med dei flott helsing til vestlandsmeistrane.