1500 personar kom til Kråko laurdag kveld for å få med seg Vamp. Foto: Amalie Sydnes / Stord24

Eit folkehav av eit publikum tok turen til Kråko laurdag kveld for å sjå Vamp opptre ved Port Steingard.

Av: Amalie Sydnes

I år er det andre året på rad at Kråko Utvikling held sommarkonsert på Kråko. Denne gong har billettsalet nesten dobla seg i frå i fjor, med omlag 1500 solgte billettar. Koordinator for konserten, Jorunn Hernes, er svært nøgd med oppmøtet.

– Eg syns det er heilt rørande at så mange kjem og møter opp. Me hadde jo ein liten mistanke om at regnet skulle hindre folk i å kome, men det gjorde det absolutt ikkje. Alle er så fargerike og flotte i regnkleda sine, seier ho.

– Det at heile 1500 personar skulle kome her til Kråko i kveld er eg rett og slett imponert over. Det er veldig kjekt for oss, og me håpar jo at det vil bli like bra neste gong, fortel Hernes.

Publikum kosar seg på konsert. Foto: Amalie Sydnes / Stord24

Konserten som vart helde ved Port Steingard på området utanfor ELØ og PS Bryggekafé, opna dørene kl 18. Allereie då var området fullt med eit ivrig publikum. Då Vamp gjekk på scenen i 19-tida sto det fortsatt folk i kø for å kome seg inn.

Mor og dotter på konsert

Martha Sørensen og dottera Ingeborg Stene i frå Os er begge begeistra for Haugesund-bandet. Dei har fleire gongar vore på konsertane deira og kom hit med båt i frå hytta på Tysnes for å få dei med seg ein gong til.

– Eg og Ingeborg likar godt å høyre på Vamp. Konsertane deira er veldig kjekke og det er alltid god stemning blant publikum. Det gjorde ingenting at det var stygt vêr, det er berre kjekt å vere her saman med familie og å nyte musikken, fortel Martha Sørensen.

Martha Sørensen og Ingebord Stene elskar Vamp. Foto: Amalie Sydnes / Stord24
- Annonse -

Under heile konserten var publikum i godt humør og sang med til kjende og kjære songar. Vamp spela mykje stoff i frå sitt siste album «Brev». Då dei kjente songane Liten Fuggel, Tirn’a Noir og Månemannen kom på vart det sunge av full hals blant publikum.

Etter Vamp var det Ole André Westerheim som overtok med sitt Queen Tribute show, etterfulgt av 80-tallsparty. Stemninga var på topp og folk dansa og song. I år var det fleire serveringspunkt på konsertområdet enn i fjor og mange nytta seg av drikke- og mattilboda i frå ELØ og PS bryggekafé.

Kvelden var lang og publikum var nøgd med årets sommarkonsert på Kråko.