I går godkjende Sigurd André Maraas den første løpsbilen for sesongen.

Måndag denne veka heldt Fitjar Racingteam årsmøte i klubblokalet på Rydland, og Elisabeth Vågen overtok som leiar for ein organisasjon med jamt god aktivitet.

Av årsmeldinga går det fram at Fitjar Racingteam hadde ti aktive førarar i sesongen 2019. Jamt over har seks-sju løparar delteke under løpa på heimebanen i Vikedal, og litt færre på Eikåsbanen i Bergen. Bilcrossførarar frå Fitjar deltok også på løp i Eigersund, Kvinesdal og under landsfinalen på Konsmo.

I bilcross junior har Ole K. Lønning, Thea Vågen Matre, Aleksander Sætre og Benjamin Hall køyrt for Fitjar. I seniorklassen har Martin Fausk, Audun A. Mehammer, Joakim Strand, Jonas Heggøy og Simon Sætre vore med. Oliver André Matre har teke steget opp i rallycross, og der har han delteke saman med Håvard Helland. Likevel tok han midlertidig steget tilbake til VW-bobla i haust og vann klubbmeisterskapet i NMK Vikedal.

Fitjar Racingteam har også to førarar i motocross; det er Eirik Fitjar og Adrian Vik. Sistnemnde er aktiv i MX 85 ccm og har vore med i eit opplegg for lovande førarar rundt norgesmeister Magne Klingsheim.

I fjor kom Kristjan Kristjanson til Rydland og godkjende bilane. I år er den lokale helten Sigurd André Maraas godkjend for dette oppdraget, og laurdag 21. mars kan alle møta fram på Rydland for å få godkjent bilane sine.

Men Sigurd André er allereie godt i gang med dette oppdraget, og i går var ein historisk dag for Fitjar Racingteam. Då godkjende varaordførar Maraas den første løpsbilen for sesongen 2020 i verkstaden på Rydland.

Dei 20 frammøtte under årsmøtet i Fitjar Racingteam kunne elles konstatera at drifta går jamt bra. Etter valet tek Elisabet Vågen over som leiar for eit styre som elles består av Ole Vidar Helland, Alf Inge Træet, Frode Bunes og skrivar Elise Tufteland. Varamedlemmer til styret er Arild Vik og Joakim Strand. Revisor er Gaute Aarbø. Det skal ikkje vera vanskeleg å få folk til å ta på seg tillitsverv i organisasjonen.