Tysdagsklubben inviterte til utflukt på Helland sist veke.

Nesten 70 born og vaksne var på plass då Johannes  ønskte velkommen til tysdagsklubb ute i Guds frie natur. Han spela gitar og songen ljoma mellom bjørketrea. Varmen frå sola gjorde godt for det var ikkje alle som fann seg ein sitjeplass i le av nordavinden. Karen Elisabet heldt andakt, og ho fanga borna sin oppmerksomhet ved bruk av ein stor plakat og tusj.To store grillar stod klar og det var nok mange som metta seg med pølse og anna som høver som grill-mat. Nokre tok heller fram termosen og kosa seg med kaffi og litt kake. Borna sat ikkje lenge i ro for det var spennande å klatre over berg og stein.

Då Reidun gav klarsignal til natursti, gjorde mange grupper seg klar til innsats. Første post høvde godt for born i alle aldrar. Det skulle skytast med ertepistol mot ei isoporkasse. Om ei tid ser ein nok at ertene har begynt å spire der dei vart liggjande i terrenget; kanskje ein godbit for sauene som beiter i området? Naturstien gav mange utfordringar og alle såg ut til å trivast i lag då dei grubla på rette løysingar. Dei som hadde flest rette svar fekk kvar sin premie.

Høgdepunktet for borna var kanskje utdeling av premiar til dei som hadde møtt fram til tysdagsklubb gjennom to semester. Ballongar og søndagsskuleblad var og med i utdelinga. Dei minste var trøtte då alle tok på heimveg. Han som låg i vogna fekk nok hompa seg litt  for det var ujamnt å trille i marka.

Som vanleg er det klubb-fri i sommarferien, men til hausten kjem ny invitasjon til å samlast på Øvrebygda bedehus.