Fleire speidar-patruljar er ute på Tråkk forskjellige stader på Fitjar denne helga.

Ved innkøyrsla til Sim trefte eg patrulje Veps, leia av Renate Tverderøy og Kristina Kobberstad, som stod klar til Tråkk.

Veps-patruljen er ein del av KFUK/KFUM-speidargruppa på Fitjar og består av jenter frå 7. og 8. klasse, samt ein patruljeførar og ein patruljeførar-assistent som er eldre. Speidargjengen hadde pakka sekkane med sovepose, liggeunderlag, lommelykt, kniv og niste, dei heldt på å snøra skorne, og var klar for overnattingstur ute. Då patruljen stilte opp til fotografering, kom dei første regndråpane, men det gjorde ingenting, for dei var vanntette, meinte dei. Leiarane hadde planlagt turen og hadde med utstyr til å laga gapahuk, slik at dei har ein tørr plass å sova i natt. Dei hadde og med speidarboka med forslag til aktivitetar, som knyting av knutar med meir. Gjengen starta turen med eit par hundre meter på asfalt, men så skulle dei ta av vegen og gå vidare inn i skogen, og etter det er det ingen av oss andre som veit kvar vegen går, og kvar det vert leirplass i natt.

Tråkk er ei ny og spennande oppleving for speidarjentene i patrulje Veps, og dei gledde seg til kvelden og natta og var lette på føtene då dei la på veg innover.