Ei stolt Lene Gyland med bukken som fall i går kveld. Foto: Privat.

Hjortejakta starta 1. september, og me kan allereie no slå fast at hjorten i Fitjar lever svært farleg.

Hjortestamma på Stordøya er stor og sterk etter ein jamn auke dei siste 50 åra. På 1960-talet var det ein aldri så liten sensasjon å sjå hjort, sjølv om han allereie då var til plage for bøndene, som ville ha graset og potetene sine i fred.

På 70-talet fekk me ein eksplosiv auke, og bøndene må ha hjelp av andre interesserte jegerar for å halda hjortestamma noko lunde i sjakk. I år har viltnemnda i Fitjar gitt grunneigarane løyve til å fella heile 214 hjortar. Desse er fordelte på dei ulike hjortevalda, eller jaktfelta, i Fitjar, og til dømes skal heile 95 hjortar fellast i Øvrebygda.

Og hjortedyra har allereie begynt å falla som fluger. Me har berre snappa opp eit par døme frå den vellukka jakta så langt.

Tidleg søndag kveld felte Håkon R. Sæbø heile 3 – tre – hjortar på ein gong på «Håkonarbakkjen», den store, nysådde bakken ved vegen til Svartasmoget.

Denne helga er det besøk frå Trøndelag og frå Agder for å fella fleire. I går kveld var unge Lene Gyland frå Agder heldig og felte ein stor, fin bukk i Risdalen. Og bror hennar, Ruben, skaut ein liten pikar i Anfinnsdalen.

Me som ikkje jaktar, bør nok ta omsyn til at jakta er i gang. Hjorten står formeleg i kø for å bli skoten, og Fitjarposten tek gjerne imot bilete og jaktrapportar frå dei ulike krinsane.

- Annonse -