I Fitjar er det mange som driv med padling, men i den fantastiske skjergarden vår er det god plass til fleire.

Ein kan padle året rundt, men for mange er det vår, sommar og haust som er sesongen. Dersom du enno ikkje har fått prøvd denne supre aktiviteten, håpar me at denne artikkelen kan vera å gi deg eit lite puff.

Sunnhordland padleklubb har mange planar for sesongen. Allereie i mars starta me med bassengtreningar, og i april starta me med sundagspadling kl. 14.00. Dette er turar der lengde og vanskegrad vert tilpassa dei som møter opp og vil vere med. Deltakinga har vore god, og mange har fått fine turar og nye bekjentskapar her. Me vil arrangere slike sundagsturar fram til 26. juni. Kvar turen startar og kven som er dagens “guide”, finn ein ut på klubben sin blogg www.sunnpadling.blogspot.com.

Neste helg, 28.-29.mai, vil padleklubben arrangere våttkurs, nybegynnarkurs. Dette blir fjerde gongen eit slikt kurs blir arrangert på Fitjar, og her får ein viktig kunnskap som er god å ha når ein begynner å padle. Også dei som har padla ei stund vil ha god nytte av kurset. Ein lærer om padleteknikk og redningsteknikkar, både i teori og praksis. Dette for å kunne manøvrere og padle meir effektivt og verte tryggare på sjøen. Utruleg nyttig kunnskap, kurset anbefalast på det varmaste. Til hausten håpar me å kunne arrangere eit vidaregåande kurs også.

Helga 4.-5.juni vil padleklubben arrangere overnattingstur i Fitjarøyane, og dei som vil vere med på denne turen må ha gjennomført våttkortkurset. Slike turar har ein arrangert i fleire år, alltid med nye opplevingar og kjekke deltakarar. Bålkos, grilling og overnatting i telt er faste ingrediensar. Klubben har tradisjon for fint vêr på turane og satsar på det i år også. I fjor var me 18 padlarar på tur til Slåtterøy. Me overnatta på Ivarsøy og Slåtterøy og fekk omvisning på Hanøy og i fyrtårnet.

Denne sesongen har Friluftsrådet Vest utfordra padleklubben til å skapa litt aktivitet på Smedholmen, slik at fleire skal få augene opp for denne perla i Fitjarøyane. 3. juli vil padleklubben difor laga til ein padledag på Smedholmen. Her ynskjer me å visa at padling kan vera ein kjekk hobby både for små og store. Alle detaljar vedrørande denne dagen er ikkje komne på plass, men me håpar folk set av dagen, så møtest me på Smedholmen.

Me minner og om at klubben har ein dobbelkajakk til leige, denne er plassert på Vestbøstad.