Det tillyste padlekurset på Lambatøkje blei avvikla i godt vêr og med god deltaking, melder Nobukazu Imazu, som har sendt oss bilete og referat.

Sunnhordland Padlekubb arrangerte kurs for våttkort for kajakk på Lambatøkje 29.-30. mai. Ni deltakarar var med på kurset, og over halvparten av dem var fra Stord. Dei var så heldige å få Joanna Bauer som kurshaldar. Ho har vore i Fitjar for å halda padlekurs før, og seier det er «herlig» å padla kajakk her. 

Første dagen fortalte Joanna mykje om utstyr og padleteknikk. Samtidig lærte deltakarane om tryggleik og redningsteknikk. Dei måtte velta med kajakk fleire gonger for å «meistra» både sjølvredning  og kamaratredning. Nokre kledde seg i tørrdrakt og andre i våttdrakt. Det blei også pause med vaflar, og då storkoste dei seg, fortel Nobu.

Vêret var nydeleg med sol og blå himmel, men det var litt kaldt i sjøen enno.

Andre dag blei det mykje kos og avslapping. Prest Nobu måtte droppa å vera med på kurset kl. 10.00 – 12.30 for å halda gudsteneste i Fitjar-kyrkja. Men dei andre padla rundt i Fitjarøyane, og grilla i Pilapodlen. Deretter viste Joanna padleteknikk. Vidare padla dei tilbake til Lambatøkje. Der blei det bading igjen, og dei prøvde seg på ulike redningsteknikkar.

Neste helg arrangerer padleklubben «Helgetur i det nære øyriket» i samband med Fitjar kommune sitt 150-årsjubileum i 2010. Det betyr at dei skal arrangera en padletur i Fitjarøyane. Ordføraren i Fitjar har bestilt Slåtterøy fyr for ovenatting denne helga.