Laurdag 30. juni var det samla ein fin gjeng på Smedholmen på padledag i regi av Sunnhordland Padleklubb.

Sjølv om det bles friskt og vêret var litt trugande, var det samla rundt 50-60 små og store, noko arrangøren synes var bra. Padleklubben frakta 10 barnekajakkar ut til Smedholmen i tillegg til vaksenkajakkar og ein dobbel kajakk. Born og vaksne fekk her testa padling under veiledning av erfarne padlarar i klubben. Mange uttrykte stor glede over å få prøva å padla, og fleire av borna hadde gleda seg lenge til denne dagen. Ungar heilt nede i 4 års alder prøvde å padla i barnekajakkane, og dei storkoste seg.

Ein fin gjeng overnatta på Smedholmen i telt og lavvo natta før. Nokon kom med eigen kajakk eller båt, medan andre kom med arrangøren sin båtskyss frå Grønavikjo. Padleklubben stilte med varm grill og eit partytelt som gav livd for vinden. Her koste deltakarane seg med medbrakt grillmat og snop, sosialt og kjekt. På land var det og laga til ein natursti med spørsmål for ungane. Alle deltakarane her fekk premie, og det var sjølvsagt stor stas.

På grunn av vêrmeldingane vart introkurset som skulle vera på Smedholmen avlyst. Dette kurset vil bli arrangert seinare, og det er berre å ta kontakt med klubben dersom ein er interessert i eit slikt kurs. Klubben arrangerte og eit teknikk-kurs denne helga, og deltakarane her kom innom Smedholmen og åt grillmat i lag med resten av gjengen. Sunnhordland Padleklubb takkar alle som kom og gjorde dette til ein flott dag. Ein satsar på at dette skal bli eit fast årleg arrangement.