Fitjar skulekorps gjekk direkte frå 3. divisjon til pallplassering i 2. divisjon under korpskonkurransen Sotrafestivalen i dag. Prestasjonen til dei unge korpsmusikantane frå Fitjar gjorde sterkt inntrykk på mange.

For to år sidan deltok Fitjar skulekorps for første gong i Sotrafestivalen. Den gongen spelte dei i 3. divisjon og både det året og året etter kom dei heilt til topps i sin divisjon. I år var det tid for å ta eit steg vidare, til 2. divisjon, der nivået er betydeleg høgare.

Korpset har øvd godt i det siste og har hatt fleire gjennomkøyringar av konkurranseprogrammet med publikum. Konkurransestykket The Bold and the Brave sat godt, men det var likevel ein spent gjeng som reiste til Sotra laurdag føremiddag. Tanken på korleis dei ville klara seg blant dei andre gode andredivisjonskorpsa, surra i mange hovud. På tross av spenning og lett nervøsitet  var stemninga god då alle møttes på Sotra i god til før konkurransespeling. Musikken var ferdig finpussa, men nokre av instrumenta fekk ein omgang med pussekluten og mange ville få håret ordna skikkeleg før dei var klar for å visa seg fram. 

Ein stor, patriotisk heiagjeng hadde funne vegen til gymnastikksalen ved Fjell ungdomsskule og sat og venta på korpset «sitt». Nokre av foreldra var kanskje vel så nervøse som musikantane, men då første tone i Richard Rock sitt stykke var satt, så perfekt som det berre går an, då var det berre å lena seg tilbake i dei harde gymsal-stolane, stola på musikantane og nyta opplevinga.

Som vanleg under konkurranse så presterte korpset sitt aller, aller beste på scenen. Domarane smilte mellom satsane, togg tyggis i takt med musikken og klappa iherdig etter at korpset hadde reist seg og spelte siste fortissimo-tone i The final chapter.

Musikantane strålte, dirigenten og foreldra var overvelda og det var eit smilande og letta korps som forlét scenen. 

Etter nokre timar med «shopping» og «fastfood» var dei som hadde teke seg tid til å vera igjen for å få med seg festkonserten klare til å høyra meir korpsmusikk og ikkje minst få vita resultatet. Årets festkonsertkorps var Sandviken ungdomskorps. Dei leverte ein flott konsert med stor underhaldningsverdi og til inspirasjon for musikantar på veg oppover.

Spenninga i Fitjarleiren var stigande då det nærma seg annonsering av resultatet i 2. divisjon brass. Resultatet var overveldande. Med 100 poeng kom Fitjar på ein klar 3. plass, og synte med det at dei ikkje berre høyrer heime i 2. divisjon, men og ligg på topp tre der. Sjølv om alle involverte vart overvelda av glede og den gode plasseringa kom ganske uventa var det likevel vel fortent. Domarane Tormod Flaten og Erik Gjerdevik var udelt positive i sine kommentarar og sa at Fitjar skulekorps var eit gledeleg kjennskap, at dei synte ryddig samspel, rein klang, god dynamikk og rytmikk, flinke solistar, dei var gode på detaljar og spelte eit stykke som kledde korpset svært godt. Så var og stykket spesialskrive for Fitjar skulekorps av den irske komponisten Richard Rock. Stykket består av tre ulike satsar, og på den andre av desse, A new hope, hadde Ragnhild Prestbø euphoniumsolo. Ho fekk og gode tilbakemeldingar, til liks med dei mange musikantane som hadde mindre soloparti.

Fitjar skulekorps var nok ein gong tydelege og flinke fitjarambassadørar, og Fitjarposten stiller seg bak domarane si slutt-helsing til korpset: «Bravo! og Takk!»