To lag frå Øvrebygda har vore på Vikahaugane og spela volleyball i dag.

Dei to laga trenar ein gong i veka i gymsalen på Øvrebygda skule. Best gjekk det for herrane, som har drive Gubbatrim i mange år. Dei har vore med på HobbyVolley før, men no er det fleire år sidan.

Etter det me forstår, er volleyball hovudaktiviteten når dei møtest til trim kvar onsdag, og dei blei slett ingen kasteball i dagens volleyballcup. I gruppespelet hadde dei ingen problem med dei tilårskomne herrane «Hystad serv og smash», som blei sopte av banen i to strake sett. Like eins gjekk det med «Legendane», men i den tredje innleiingskampen møtte Gubbane Frekhaug VBK, som var heilt suverene.

Med to sigrar i innleiinga nådde dei kvartfinalen, der det blei tap mot «Vandrepokalvinnarane». Til slutt tapte gubbane frå Øvrebygda mot Lucky Jack i kampen om 5.-plassen. – Men ein delt 7.-plass er me veldig godt fornøgde med, seier oppmann Rune Aarbø til Fitjarposten. – No veit me kor me står og kva me har å jobba med fram mot neste HobbyVolley, 22. mars neste år, seier han.

For damelaget «God stemning» var stemninga litt meir nøktern etter dagens innsats. I innleiinga tapte dei klart mot «Halsnøy Jaktlag» og «Turngruppo». Damen avslutta kvelden med å tapa kampen om 9-plassen, og enda dermed som nummer 10 i turneringa. Lagleiar Hildegunn Strand fortel at dei ikkje har trent så lenge saman, og at dei reknar med å bli betre etter kvart. Men det er ei utfordring å få ei stabil gruppe med damer til å trena jamt over tid.

Meir om HobbyVolley kan du lesa her.