O-folka i Fitjar er klare for ein ny sesong, melder Rolf-Atle Rolfsnes i Fitjar Idrettslag.

Han er leiar i orienteringsgruppa, og melder at o-folka er betre førebudde enn nokon gong. I ein flott brosjyre presenterer dei eit rikhaldig program for Fitjar-ungdom i alle aldrar. I løpet av vel ei veke er sesongen i gang for fullt med Turorientering, løp i Fitjarkarusellen og Finn fram-dagen, som går av stabelen søndag 27. mars.

Sesongen startar så smått førstkomande tysdag, 22. mars, med o-løp for dei små, 1. og 2. klasse, frå kunstgrasbanen. Dei har gått på idrettskulen i vinter, og får æra av å opna sesongen. Tysdagen etter, 29. mars, kjem den eigentlege sesongstarten med sprintløp/nybyrjarkarusell, også det frå kunstgrasbanen.

Så går det slag i slag utover – her kjem alle løpa i Fitjar-karusellen:

Tysdag 22. mars: Klubbhuset – løp for Idrettsskulen (2. og 3. klasse)

Tysdag 29. mars: Kunstgrasbanen – sprintløp/nybyrjarkarusell for Sunnhordland, 1. løp i Fitjarkarusellen (Idrettsskulen blir med)

Torsdag 7. april: Klubbhuset, Fitjar Idrettspark – 2. løp i Fitjarkarusellen

Tysdag 26. april: Olstjødno – 3. rankingløp for Sunnhordland – 3. løp i Fitjarkarusellen

Torsdag 12. mai: Kulturhuset – 4. løp i Fitjarkarusellen

Torsdag 19. mai: Tveitasaga – 5. løp i Fitjarkarusellen

Torsdag 9. juni: Øvrebygda – 6. løp i Fitjarkarusellen

Torsdag 18. august: Vassverket – 7. løp i Fitjarkarusellen

Torsdag 1. september: Dalshaugane – 8. løp i Fitjarkarusellen

Torsdag 15. september: Klubbhuset – 9. løp i Fitjarkarusellen

I Fitjarkarusellen blir det ei N-løype og ei C-løype, og det blir premie til alle som er med på minst 4 av løpa.

O-løpa på Stord kan du lesa meir om her:

Frå laurdag 26. mars kan du få kjøpt turorienteringsmappa på Videoen eller på MX Sport hos Larsen. I år er det lagt inn 25 postar på kartet over Nord-Stokken, 5 postar i Rossneset, og 20 postar på det nye kartet over Midtfjedlet. Dersom du ikkje alt har registrert deg som deltakar, kan du gjera det her. Etter kvar tur registrerer du postane dine på nettet. Her kan du halda oversikt over kor mange poeng du har og samanlikna med andre. Du kan òg skriva ein blogg om korleis turen var; om vêr og vind, og kor mange postar du var innom osv.

Materiellet til turorienteringa vil òg bli å få kjøpt på Finn fram-dagen søndag 27. mars. Den blir arrangert i samarbeid emd Barnas Turlag, til Olstjødno, Svartavatnet og – vonleg – til Beinatjønnsvarden. Turen startar frå vassverket, og undervegs blir det oppgåver som skal løysast. Ved Olstjødno blir det pølser og saft til alle. På turen vidare til Svartavatnet og Beinatjønnsvarden blir det mogleg å finna ein del av turorienteringspostane (sjølv om ein ikkje har kjøpt materiellet). På toppen kan ein klippa i topptrimkortet, før turen går vidare på stien ned igjen til vassverket.