– Me gir oss ikkje, og kjem sterkare tilbake neste år, då skal me vinna NEZ-cupen i crosskart.

Det er pressetalsmann i Fitjar Racing Team, Sigurd André Maraas, som seier dette til Fitjarposten – før Ingve André Strand har fått tørka sanden or augo etter crosskartfinalen i Danmark søndag ettermiddag. Sidan Ingve reiste nedover med sjansar til å vinna den internasjonale tittelen i NEZ-cupen, «North European Zone», var det litt laber stemning då han måtte nøya seg med sisteplassen i finalen. Men både Ingve og hjelpemann Sigurd tar vonbrotet med fatning; i motorsport er det ofte slik at «det skjer ting». Og det fekk me altså røyna til fulle denne våte helga på Nysumbanen tre mil sør for Ålborg.

I det ufyselege regnvêret blei dei danske sanddynene etter kvart heilt uhandterlege for dei stakkars kartførarane. Under dei første innleiingsheata var forholda normale, og favorittane innfridde. Men i siste innleiingsrunde oppstod dramatikken. Då var banen blitt så våt at det var omtrent uråd å sjå noko som helst om ein kom inn i drevja frå kartar framfor seg. Slike forhold er nok ikkje kjørebrillene konstruerte for. Dei fungerer slik at føraren drar i ei snor for å fjerna 
det tildekte stykket plast og få fram ny, blank plast i brillegluggane. For Ingve André skar dette seg heilt; han fekk ikkje fram ny, rein plast, og såg dermed ikkje nokon ting, og måtte bryta løpet.

Etter ein heatsiger og ein andreplasss i innleiinga var han likevel klar for A-finalen, ein finale som var svært nær på å bli avlyst. Det var allmenn semje om at dette ville bli ein sjanseseglas, på grensa til det uforsvarlege. Resultatet av denne finalen kjenner me etter kvart; denne gongen var det Ingve André det «skjedde noko med», og med sin åttandplass i A-finalen var han sistemann som fullførte. Alle dei andre favorittane kom seg heilskinna gjennom, og dermed kunne ikkje Ingve avansera frå sin fjerdeplass i NEZ-cupen samanlagt. 

Ei mager trøyst i finalen var at ungdommen Espen Ytreland Ruud frå Geilo kjørte inn til ein fin andreplass. Han kjørte rundt med ein forgassar han fekk låna av Ingve i siste liten, fordi hans eigen ikkje fungerte. I det heile ser motorsportfolk ut som eit hjelpsamt folkeferd. Fitjar Racing Team hadde rett som det var besøk av konkurrentar som hadde bruk for praktisk hjelp eller å låna eitkvart. Det er ein del av gamet å hjelpa kvarandre. I depotet er folk gode kompisar, sjølv om dei er rivalar når dei stiller på startstreken. Såleis minner dagens motorsportentusiastar lite om dei skurkane me kjenner frå «Ben Hur» eller «Flåklypa Grand Prix». Her er stemninga helst triveleg, men me skjønar at når førarane står på startstreken, er det kampen om dei fremste plassane og prestisjen som overskyggar alt.

Prestisjen er tydelegvis ikkje berre knytt til dei vaksne som kjører i dei tyngste klassane. Brørne Petter og Henning Solberg var til stades med kvar sin son, noko som absolutt ikkje la noka demping på stemninga. At begge vann sine klassar, Oliver i klassen 85 ccm og Oscar i klassen 125 ccm, gjekk ikkje upåakta hen. Heller ikkje sigerspiruetten til Oscar, son til Henning Solberg. Dette er unge gutar som ser ut til å følgja i fedrane sine bilspor. Dei har større ressursar enn dei fleste, og drar nok fordelar av det. Men dette er absolutt ein sport det går an å hevda seg i også for dei som ikkje høyrer til «Petter Solberg World Rally Team». Det er først og fremst føraren som tel.

Her kan me sjå video av den dramatiske finalen i på YouTube:

Resultatliste frå løpet i Danmark kan me lesa på nettsidene til arrangørklubben Motorsport Nordjylland: