Gro Rydland har sendt oss ein e-post der ho skriv om Tysdagsklubben si første samling denne hausten. Gro har og tatt biletet som følgjer med.

Tysdagsklubben i Øvrebygda starta opp etter ferien denne veka. Programmet startar alltid med samlingsstund for dei små og store kvar for seg. Tidlegare har dei kunna høyra kvarandre gjennom veggen, men nå hadde nokre av leiarane pussa opp kjellarlokalet slik at dei minste kunne vera der. Dermed fekk dei god plass for seg sjølv, og det vart mykje kjekkare for alle.

Karen Elisabet Rydland Sæbø er leiar i Tysdagsklubben. Ho fortel at dei fekk ei gåve på 10 000 kroner frå Fitjar Kraftlag i vår, og at pengane skulle brukast til noko for klubben. Bedehusstyret syntes ideen om å friska på lokala i kjellaren var ein god idé. På nokre kvelds- og morgonstunder rakk tre – fire vaksenleiarar å bli ferdige. Pengane frå Kraftlaget var heilt avgjerande for å få tak i materiell. Kombinert med dugnadsånd og arbeidsvilje, blir det gode resultat!

Det blafra i dei nye blomegardinene og lukta litt av oppfriskinga då me såg innom. På veggene var fine bilete frå “Sprell levande” hengt opp. Ungane var ivrig med då Reidun Ahrens Helland fortalde. Etter samlingsstunda brukar ein å ha praktiske aktivitetar. Ungane kan velja mellom hobbygruppe, baking, uteaktivitetar og snekring. I haust vil det også bli ei gruppe for dei eldste med biljard, luftgeværskyting mm.