Kvart år arrangerer Fitjar Vidaregåande Skule open dag. Her vil dei visa kva dei held på med, skapa ein møteplass for både eldre og yngre og ikkje minst visa skulen fram for potensielle søkjarar.

Det yrer av folk i alle aldrar, elevane har med seg foreldre, besteforeldre og småsøsken. Det er også nokon som ikkje har noko elev på skulen, men er der for å treffe folk. Elevane på vg1 har laga ein flott pepperkakeby som står utstillt i kantina, medan nokre elevar frå restaurant og matfag har elevbedrift. Her sel dei gode heimelaga brød og lefser som sel som berre det. Lefsene vart selde på berre 10 minutt.

Barn og ungdom har laga eit kjekt og underhaldande teaterstykke for dei minste. Her fekk me møte blant anna Tingeling, Svampebob, Askepott og dei andre prinsessene på slottet, Ole Brum, Tigergutt, Sid og Pippi Langstrømpe. Barna storkoste seg og vart inkludert i stykket. Emilie og Jørgen var på teater og synest det var veldig gøy. Dei meinte det kjekkaste var når dei fann prinsessa som hadde blitt kidnappa. Det neste dei no skulle gjera var ansiktsmaling, noko som er ein kjempehit hos dei minste.

Elles rundt om på skulen kan du sjå flotte utstillingar, spennande naturfag-eksperiment og kanskje du ville vera med på ein aldri så liten aerobictime i lag med elevane på Helse og sosial? Skulen vert besøkt av både barn, vaksne og pensjonistar. Det er eit godt tilbod for dei eldre, ein god møteplass. Nokre av pensjonistane er tidlegare elevar som synest  det er veldig kjekt å vitja skulen att, dette er eit stort høgdepunkt kvart år, fortel dei.

Det er også eit loppemarknad kor du kan få kjøpt alt frå sportutstyr til ein sofa. Desse pengane går til ein barneheim i Ukraina, som skulen har eit godt samarbeid med. Kvart år får elevane reise ned og hjelpe til med oppussing og liknande. Dei bruker dei innsamla pengane til nye senger, nattbord og andre nyttige ting. Dei har sett store forandringar på barneheimen for kvart år dei har vore der. Det er viktig for elevane å få hjelpa til, og veldig rørande for dei å reise ned og sjå korleis dei har det. Flott initiativ!