Dei som møtte opp på Sveiseneset i dag, fekk høve til å sjå båtar som har vore og er under arbeid på verftet.

Fiskebåten Harvest var komen på besøk og no er ein ny Harvest under bygging. Kystverket sitt nye spesialfartøy låg og ved kaien. Det er fullpakka av utstyr og funksjonalitet, og er utvikla av Wãrtsila Skipsdesign (WSD), tidlegare firma Vik & Sandvik. Elles såg me tre arbeidskatamaranar som er levert sidan 2011. Desse skal nyttast i oppdrettsnæringa. Den siste av dei vart døypt i dag. Båten er utvikla i samarbeid med lokale selskap og lokale leverandørar står bak. Asbjørn Vik har designa den nye Seadives «Obelix», i tillegg til «Smaragd» og «Lerøy Trioton». Fleire båtmodellar stod utstilte i kantina, der ein og kunne finne info om desse. I Rørhallen var det føredrag av mellom anna Ove Wilhelmsen og Trygve Eiken. Dei representerer WSD, som er nabo og god samarbeidspartner med Fitjar Mekaniske Verkstad. Verftsdirektør Hugo Strand understreka at det er ein styrke å ha nærleik til firma og leverandørar, og båtar vert bygde for rederi i regionen. Han takka for svært godt samarbeid med desse.

Opplegget på Sveiseneset i dag høvde for liten og stor. Stort hoppeslott med sklie var populært blant dei minste. Det galdt og utdeling av ballongar og T-skjorter. Den kalde nordavinden kjentes godt, men i kaffekroken og på grillstasjonen var det lunt. Verftet spanderte mykje god mat og drikke. Mange kosa seg med grillmat og andre godsaker, og hadde det triveleg saman.

Noverande arbeidarar med familiar, mange av dei er utanlandske, og tidlegare tilsette var til stades saman med bygdefolk og mange tilreisande.

Mange stod samla ved den nye båten Obelix då gudmor Vibeke Liehaug føretok den høgtidlege dåpen ved å knuse flaska mot skipskanten. Skipsreiar Åge Kismul i Bergen skal overta båten.

Plakaten utanfor kantina på Sveiseneset viser kva verftet står for: FMV – Folk Med Vilje –

* Pågangsmot * Optimisme * Samhald * Initiativ * Humør.    

Det såg ut som alle arbeidarane hadde signert. Det lovar godt for framtida.