Onar Westerheim blei kretsmeister på skeiser allround i helga etter klar siger på 3000 meter i går.

Kretsmeisterskapen gjekk av stabelen på Slåtthaug i Bergen laurdag og søndag under ganske dårlege forhold. – Derfor blei det ikkje dei heilt store tidene, seier Onar til Fitjarposten.

På dei to kortaste distansane måtte Onar sjå seg slegen av den kjente «Måken» frå Tørvikbygd, Brynjulf Måkestad. Men han var klårt best på dei to lengste distansane. Særleg på 3000 meter var Onar suveren, og sikra seg samanlagtsigeren ved å slå «Måken» med heile 20 sekund. Her blei broder Harald Westerheim nummer to, 18 sekund bak Onar si vinnartid på 5.11,96.

Neste helg er det EM allround i Erfurt, og torsdag morgon reiser både Harald og Onar med fly til Tyskland. Med på turen blir også Jan Henriksen frå Stord, og sekundant Elise Aarbø. Onar seier dei vil sleppa litt opp på treninga dei komande dagane, for å spissa formen mot EM. Her møter nemleg skarpskodde nederlendarar som Onar vil få meir enn nok med å halda bak seg.

– Men det er jo denne spenninga som gjer at eg held på med dette, seier Onar, som gler seg til å møta dei beste skeiseveteranane i Europa.