Her har Oliver fått pokalen sin på banketten laurdag kveld.

Oliver André Matre frå Fitjar Racing Team leverte ein strålande innsats under Landsfinalen i bilcross i Verdal, og blei til slutt nummer 9.

Oliver fortel til Fitjarposten laurdag kveld at han er kjempefornøgd med eigen innsats i Verdal. Ein 9.-plass blant alle dei beste bilcrossførarane i landet er slett ikkje å kimsa av.

Beste Landsfinale-innsats av Fitjar-førar

Etter det me får opplyst i klubblokalet på Rydland, er dette den beste plasseringa nokon Fitjar-førar har oppnådd i den prestisjetunge Landsfinalen i bilcross. Nesten 140 førarar stilte til start i Verdal, så konkurransen var beinhard.

Innsatsen til Oliver var gjennomført solid. Han fekk to førsteplassar og ein andreplass i innleiande heat. Det heldt til ein plass midt i feltet i B-finalen. Her blei han nummer fire, og dermed totalt 9.-plass på resultatlista, som tel 137 førarar.

Kjøpte havarert boble!

Oliver og bobla hans blei lagt så godt merke til at bilen hans blei kjøpt opp på bud etter løpet. Men Oliver kjem ikkje tomhendt heim att likevel. For sambuaren hans, Kristina, kjøpte ny bil til han etter løpet.

Ho hadde tidleg på laurdagen lagt merke til ei gul boble som gjekk ganske godt, og den hadde ho lyst til å kjøpa. Spesielt sidan det var ein bil som hadde vore i Oliver si eige tidlegare. Ho var så ivrig på å få tak i denne bilen at ho sprang til og la inn bud rett før bilane gjekk i mål.

Det ho ikkje hadde fått med seg, var at denne bobla miste motorkrafta rett før målgang. Det viste seg at det var sprengt eit stort hol i motorblokka! Dette var sjølvsagt ein lei strek i rekninga, men resten av bilen er god. Og Oliver har delar nok til å byggja opp ein ny motor.

Derfor er han optimist framfor dei to siste løpa i år. Der vil Oliver vil kjempa om samanlagtsigeren i vestlandsmeisterskap 2018. Og Oliver ankar ikkje – han har alltid delar og bobler nok!

Her har Oliver fått pokalen sin på banketten laurdag kveld.