Oliver André Matre (t.h.) melde overgang til rallycross i vinter, men stiller opp med boble på todagaren, i konkurranse med blant andre Sølve Østbø. Foto: NMK Vikedal.

Til helga er over 80 bilcrossførarar venta til Vikedal for å vera med på Todagarscrossen, og blant desse stiller Oliver André Matre saman med ein solid gjeng frå Fitjar Racing Team.

NMK Vikedal skriv i ei pressemelding at Todagarscrossen nærmar seg. Over 80 førarar har meldt seg på, og dei skal kjempa om store pokalar og mykje prestisje. Løpet gjeld og som kvalifisering til Landsfinale i junior og senior, som går av stabelen i august.

I bilcross junior ville Bjørn Cato Aarekol frå Vikedal vore ein klar favoritt, skriv NMK Vikedal, etter siger i 3. runde i vestlandsmesterskapet, som gjekk i Bergen denne helga, og klar leiing samanlagt. Men han er på Finnskogen og kjører NM-runde for crosskart, og skal forsvara seieren på heimebane for tre veker sidan. Der skal han blant andre kjempa mot den tidlegare NM-vinnaren Ingve André Strand …

Ole Lønning er klar til start i Vikedal til helga. Foto: Privat.

I juniorklassen stiller desse Fitjar-førarane: Ole Lønning, Thea Vaagen Matre og Aleksander Sætre (debutant). Dei vil få meir enn nok med å slå kvinesdølar, bergensarar og klubbkameratane sine frå Vikedal, som Sondre Åsheim frå Ølen, brørne Daniel og Mikal Finnvik frå Hebnes, og søstrene Ingrid og Elise Dybvik Jensen frå Torvastad.

Oliver Andre Matre, Jonas Heggøy, Audun Mehammer og Joakim Strand er Fitjar sine representantar i seniorklassen. Her blir nok Oliver vår fremste mann, men det er alltid spanande om bobla held i fem omgangar og eventuelle finalar. Han vil ganske sikkert frå skarp konkurranse frå Sondre Hundseid Eikeland, Ølensvåg, som vann i Vikedal i mai.  Sverre Hundseid frå Vikedal, Sølve Østbø frå Ølen, Thomas Hundseid Eikeland frå Vikedal og Eirik Sandvik frå Skjoldastraumen er heller ikkje til å spøka med. Sølve Østbø leiar vestlandsmeisterskapet så langt.

Sjølv om Oliver Andrè Matre har «sala om» til rallycross, som det heiter i pressemeldinga, vil han nok gjera det han kan for å komma først til mål i bobla si. For vår del er me òg spente på korleis dei andre tre Fitjar-førarane klarer å hevda seg; Jonas Heggøy, Audun Mehammer og Joakim Strand.

– Dermed skulle alt vera klart for både tøffe konkurransar og god underhaldning over to dagar, med tre omgangar på lørdag, og to omgangar og finalar på søndag, skriv NMK Vikedal avslutningsvis, og minner om at køyringa på søndag bli strømma av TV Haugaland.

Ole Lønning vil markera blåfargen til Fitjar Racing Team i Todagarscrossen. Foto: Privat.
- Annonse -