For dei som kvir seg med heile 7-fjellsturen laurdag 1. oktober, finst det eit litt meir moderat alternativ, melder arrangementskomiteen.

Etter rundt fire timar, vil ein vera framme ved utløpet av Svartavatnet. Her kan det vera greitt å trekkja seg for dei som føler det blir i tøffaste laget å gå fire-fem timar til i Fitjarfjellet. Då er det natureleg å følgja bilvegen ned frå Svartavatnet til Rimbareid. 

Dette er ein tur på rundt fem timar, vel halvparten av 7-fjellsturen i si fulle lengd. Det er sjølvsagt ikkje nødvendig å bestemma seg før ein kjem fram til Svartavatnet, og kjenner på seg kor mykje meir kroppen toler. Komiteen minner igjen om at turen er på eige ansvar, men vonar mange blir med på haustens vakraste eventyr.