Søndag fekk Fitjar-dommaren Signe Kvalsvik Rydland den offisielle dubuten sin som hovuddommar i toppserien for damer.

Ho har etter kvart fått ein god del erfaring som assistentdommar på dette nivået, og i fjor fekk ho dømma Sandviken – Tronheims-Ørn i toppseriekamp. Men gårsdagens oppgjer var første kampen der ho var blitt oppnemnd av NFF som hovuddommar, og denne gjeld som offisiell prøvekamp for toppserien.

Etter dei uoffisielle rapportane frå Klepp Stadion å døma, kom Signe godt frå oppgåva. Det blir rapportert om få protestar frå spelarar, lagleiarar og frå tribunen. Det er som oftast eit godt teikn, og Signe seier til Fitjarposten at ho ser lyst på utsiktene til å få fleire kampar på dette nivået.