Ronald Skår må gå ut midt i første omgang. Foto: Kjetil Rydland.

Torsdag kveld blei det eit nytt tap for A-laget til Fitjar, då Mathopen vann 3-2 i det sure spelevêret i Fitjar Idrettspark.

Poenga ser ut til å sitja langt inne for Fitjar sine beste menn i årets 5. divisjon. Gjestene frå Mathopen var eit strå kvassare enn heimelaget på det sleipe fitjargraset i kveld, og sikra seg siger 3-2 etter 2-0 ved pause.

Begge laga trassa dei dårlege vêr- og føreforholda, og prøvde å spela fotball, utan at dei 50 tilskodarane fekk sjå noko festfyrverkeri i regn og åtte plussgrader. Første omgang baud kanpt på ein einaste sjanse for nokon av laga, og dei to måla til Mathopen var av det enkle slaget.

Etter rundt 35 minutt spela gjestene seg skræmande lett gjennom, før Adrian Davanger var nesten åleine med ballen framfor Fitjar-målet på tre-fire meters hald. Han kunne ikkje unngå å scora. 0-2 kom rundt fem minutt seinare, og verka endå meir unødvendig. I lag med ein flokk heimespelarar inne i Fitjar-feltet var det berre Mathopen-spelaren Morten Gundersen som viste vilje til å kjempa om ballen. Headinga gjekk i ein fin boge over keeper på halvdistanse.

Etter pause tok Fitjar seg litt opp, og det var ikkje direkte ufortent at Daniel Skarpnes kunne redusera til 1-2. Han blei spela gjennom av Marius H. Storebø, drog seg fint fri frå ein heil flokk motspelarar, før han plasserte ballen fint i mål.

Etter reduseringa augna Fitjar eit ørlite håp om utlikning, men berre i ti minutt. For då auka Mathopen til 3-1 etter på nytt å ha spela seg heilt gjennom Fitjar-forsvaret. Frå kort hald kunne Kristian Vindheim Rivedal setja ballen roleg i mål frå kort hald.

Dermed var kampen avgjort, men Fitjar gav seg ikkje heilt. Eit minutt før ordinær tids slutt reduserte Emil S. Fitjar frå kort hld, via ein Mathopen-rygg. Og gjestekeeperen måtte ta fram ein glimrande beinparade på overtid for å hindra innbytar Kristian Træet i å utlikna.

Dermed ebba kampen ut med ein fortent bortesiger. For Fitjar ser det vanskeleg ut for tida, og dei nærmar seg botnen av tabellen i 5. divisjon. Men heldigvis ser og ein del andre lag ut til å slita med å få poeng. Ein ny sjanse til poeng kjem fredag 31. mai, mot Vaksdal på bortebane. Neste heimekamp er tysdag 4. juni, mot Juristkameratene.

Fitjar – Mathopen 2-3 (0-2)

Seriekamp 5. divisjon Hordaland avd. 03
Fitjar Idrettspark torsdag 23. mai kl. 19.50
Publikum: 47
Dommar: Bjarte Kaland Hestenes, Varegg

Mål: 0-1 Adrian L. Davanger (35.), 0-2 Morten Gundersen (40.), 1-2 Daniel Skarpnes (74.), 1-3 Kristian V. Rivedal (84.), 2-3 Emil S. Fitjar (89.)

Gult kort: Emil S. Fitjar, Fitjar (39.), Sander Røen Johnsen, Mathopen (92.)

Fitjar sitt lag mot Mathopen: Ruben Træet, Emil Sæterbø Fitjar, Ronald Skår (Viktor Fjelltun 23.), Helge Myrmel Træet, Torbjørn Korsvik, Svein Arne Jordan Raunholm, Øyvind Fluge Rydland, Leif Tore Nesbø Aarland (k), Daniel Skarpnes, Ronny René Bjellebø (Kristian Træet 63.), Marius Helland Storebø.

Emil Sæterbø Fitjar berga Fitjar fleire gonger, og scora eit mål via ein Mathopen-rygg. Foto: Kjetil Rydland.