Det blei eit nytt knepent nederlag for handballdamene til Fitjar IL då dei møtte Lyngbø i Bergen søndag.

Det vil seg ikkje heilt for Fitjar-damene for tida. Bortekampen mot Lyngbø på søndag gav det tredje tomålstapet på rad i februar, denne gongen med sifra 23-25. Laga fylgde kvarandre gjennom heile kampen, med Lyngbø i knapp føring det meste av tida.

Det må nemnast at Fitjar reiste til kampen utan innbytarar. Mellom anna måtte spelande trenar Charlotte Solberg ta på seg rolla som strekspelar. Ho meistra oppgåva godt, men ville nok vore meir nyttig på backplass. Keeper Kristine Korsvik spelte ein ny god kamp, sjølv om det blir lite trening i lag med dei andre etter som ho bur i Bergen. Vingspelet fungerte bra med Randi Thorland og Anna Clemmentsen på kvar sin ving. Toppscorar vart Maj Engevik med 9 mål.

På tross av tap var jentene enige om at det hadde vore ein kjekk kamp. Det er trass alt det viktigaste.

Laget:

Kristine Korsvik

Anna Clemmentsen

Randi Thorland

Kristin Tjessem Dahl

Charlotte Solberg

Ingvild Rimmereid

Maj Raunholm Engevik

Etter tomålstapet i Bergen, ligg handballdamene framleis på sjetteplass i 5. divisjon, med sine 12 poeng. Neste sjanse til poeng blir i heimekampen mot Flaktveit laurdag 12. mars.

Resultat og terminliste kan du lesa på www.handball.no.