Damelaget gjekk på eit stortap mot Fana 2 i seriekampen søndag, og etter kvart måtte me sjå at også gutane i tolvårsklassen og jenter 11 år tapte sine kampar.

Damene frå Fana 2 var klart betre enn heimelaget, og kunne reisa heim med siger 36-19. Fitjar-damene heldt følgje i rundt fem minutt, til det stod 2-2. Men derfrå og inn hadde Fana-jentene full kontroll, og kunne gå til pause med leiing 18-10. I andre omgang heldt dei fram der dei slapp, medan dårlege ballmottak og feilpasningar prega Fitjar-damene. Gjestene frå Fana takka for tilboda, og gav seg ikkje før det stod 36-19 på resultattavla.

Fitjar sitt lag (mål i parentes):

Kristine Korsvik (k)
Solveig Fitjar (k)
Marita Nysæther (4)
Randi Thorland (5)
Charlotte A. Solberg (1)
Ingvild Rimmereid (3)
Kristin Tessem Dahl (1)
Ingvild Kannelønning (4)
Amalie Korsvik
Maria Larsen (1)
Lillian Djuvsland

Dagens lyspunkt sett med Fitjar-auge var kampen mellom Fitjar og Kvinnherad i klassen gutar 12 år. Heimelaget kunne gå til pause med leiing 5-4 etter godt keeperspel. I andre omgang blei det litt verre, sjølv om gutane viste mykje fint spel. Sluttresultatet 6-9 lar seg absolutt høyra, sjølv om dette var ein kamp gutane kunne vunne.

I klassen jenter 11 år fekk me eit nytt braktap. Keeperen til Fitjar hadde mange fine redningar i byrjinga av kampen, men etter kvart blei Nordnes-jentene altfor gode, og kunne gå til pause med 10-0. I andre omgang fekk me sjå to fine mål ved Nora M. Hellesund og to like fine mål ved Mathilde Bukkøy Rydland. Men det var ikkje nok til å hindra eit braktap mot gode gjester frå Bergen.