Solveig Leithaug og Garness er flotte å høyre på kvar for seg. Saman vert dei strålande. I alle fall om ein kan engelsk.

For oss var temakvelden og konserten  i Fitjar kyrkje i kveld som eit herleg kveldsbad ein varm sommarkveld. Me sumde inn i nydelege harmoniar med vakker avstemt, variert og kreativ instrumentalmusikk, som ramma inn aldeles nydelege vokalframføringar.

Godt for både kropp og sjel, syntest me.

Solveig Leithaug er på marknaden med CD-en «Finding Home», og mykje av det me fekk høyre på konserten var frå denne CD-en. Nære, sterke tekstar om livet og om Gud som midt i dei vonde dagane gjev mot og meining. Ein CD me svært gjerne vil anbefale.

Garness sine songar var òg til å kjenne seg att i. Ikkje minst Typical You. Men først og fremst var det utstrålinga deira som gjorde inntrykk. Levande, ekte og talande.

To songar med klår kristen bodskap avslutta konserten. Den siste «Jesus du er mi stjerne», ein av Solveig sine første songar, var ekstranummer. Den andre «Come rescue me» handla om Han som kan berge oss i alle situasjonar, når alt håp er ute og ingen andre kan.

Dei fleste me spurde etter konserten var i det store og heile samde med oss, og fantastisk var eit ord som gjekk igjen. Ein del som ikkje fekk tak i bodskapen i dei engelske tekstane, gav naturleg nok uttrykk for at dei var skuffa over det. Men slikt går det an å gjere noko med.

Ei bortimot full kyrkje fekk med seg det heile.

Mykje låg på Eli Simonsen sine skuldrer denne gongen, men ho kan gle seg i trygg visse om at endå ein strålande temakveld er losa vel i hamn.