Fitjar leverte årsbeste då dei vann heile 5-0 på bortebane mot Søre Neset laurdag ettermiddag.

A-laget til Fitjar leverte ein kjempekamp i dag, då dei knuste Søre Neset med heile 5-0. Fitjar-trenar Kjell Træet meiner første omgang i dag er det beste laget hans har prestert i serien i år. Allereie etter 9 minutt låg ballen i buret bak Søre Neset sin keeper. Scoringa kom etter glimrande spel, fortel Fitjar-trenaren. Målscorar Øyvind Fykse Lie spela vegg med Mats Brakedal, før han kom åleine mot keeper og kunne setja ballen sikkert i mål.

Ein småsjuk Thomas Vestbøstad Waage scora to mål midt i første omgang, slik at Fitjar kunne gå til pause med 3-0. Eit knapt kvarer ut i andre omgang fullførte han eit ekte «hat trick», før trenar Kjell Træet let han gå av banen. Det siste målet til Fitjar kom ved Mats Brakedal, vel 20 minutt før slutt.

Fitjar-trenar Kjell Træet nøler som vanleg med å trekkja fram enkeltspelarar etter kampen. – Heile laget spelte godt, alle leverte ein kjempeinnsats, seier Kjell, som likevel ikkje kjem utanom ein mann: – Øyvind Fykse Lie var ekstremt god i dag; han gjekk føre med eit godt eksempel, han var over alt på banen heile kampen igjennom. Elles var det fantastisk kjekt å sjå på så mykje fint spel, seier Fitjar-trenaren, som såg heile laget sitt spela ein gjennomført god kamp.

Etter at Trott tapte mot NHH 2, er det hard kamp om andreplassen i 5. divisjon. Kanskje vil dei tøffaste utfordrarane i kampen om den andre opprykksplassen bli Os 2, som no ser ut til å satsa alt på opprykk.