Fitjar IL heng med i toppen av 5. divisjon etter fortent 2-0 mot Lyngbø heime søndag ettermiddag.

To mål av Thomas Vestbøstad Waage i midten av andre omgang avgjorde kampen til Fitjar sin fordel. Begge måla var flotte prestasjonar; det første kom på ei heading nede i hjørnet etter fint spel og innlegg frå høgresida, det andre etter at Thomas hadde ført ballen 25 meter for så å avslutta med ein markkrypar i lengste hjørnet bak ein sjanselaus keeper i Lyngbø-målet.

Fitjar var det klart beste laget kampen igjennom, men heimelaget lukkast ikkje i avslutningane. Alt angrepsspelet skulle gå gjennom midten, og der var Lyngbø godt befolka. Leif André Tangen var god på høgresida, og vingspelet til Fitjar føregjekk stort sett på den sida. Men framfor mål var hemelaget sine spelarar tamme. Fitjar fekk også to mål annullert  i første omgang. Det første etter at Jan Åge Tislevoll dytta ein motspelar før han sette ballen i mål. Det andre blei annullert for offside på målscorar Thomas Vestbøstad Waage.

Lyngbø hadde også sine sjansar i kampen, og kunne lett ha teke føringa ved to høve i første omgang. Begge gonger ved grove feil av midtstopparane Helge Træet og Nils Ingard Tislevoll, men ein god Oddgeir Træet i Fitjar-målet heldt heimelaget inne i kampen. I andre omgang hadde bortelaget ballen i tverrliggjaren to gonger etter langskot. Men alt i alt vann Fitjar ein velfortent siger, som kunne og burde vore større. Eit talrikt publikum fekk mykje å gle seg over, både sjansar, scoringar og gode vaflar.

Fitjar-trenar Kjell Træet meiner sigeren var fortent nok, men han seier spelarane hans måtte slita for poenga denne gongen. Og det kunne lett ha gått gale dersom gjestene hadde scora først. Kjell meiner ingen enkeltspelarar utmerkte seg i dagens kamp, men han gler seg over at Kjell A. Thorland alltid spelar bra, og at keeperen Oddgeir Træet spela solid. Elles er han veldig godt fornøgd med gutespelaren Emil Fitjar, som spela sin første heile kamp på A-laget. Denne gongen fekk han prøva seg på tre ulike plassar på banen, og greidde seg like godt på venstre back som på sentral midtbane og i midtforsvaret. – Det er alltid godt med ei slik «potet» som kan brukast til alt, avsluttar ein letta Fitjar-trenar, som konstaterer at Fitjar framleis heng med i toppen av 5. divisjon.