"Hvite Gutter" jublar etter å ha vunne damefinalen på straffespark. Foto: Kjetil Rydland.

Årets MX Hummel Cup blei som vanleg eit knirkefritt arrangement med mykje god fotball, og ikkje minst trivsel. Ungdommen har teke over dameklassen, eit internasjonalt lag frå Afrika og Midt-Austen vann open klasse, og velkjende travarar frå Fitjar dominerte «Rykket frå Peru», som vann eliteklassen.

Som vanleg var dagleg leiar i Fitjar kultur- og idrettsbygg, Ole Bergesen, bak mikrofonen og drog i dei fleste trådar under den etter kvart tradisjonsrike innecupen. Slik han har gjort sidan storstova i Fitjar var ny, og til neste år er det 20-årsjubileum for cupen som dei siste åra har bore namnet MX Hummel Cup.

Ole Bergesen styrte cupen med stødig hand og minst like stødig røyst. Foto: Kjetil Rydland.

Perfekt gjennomført

Og som alltid kan arrangementskomiteen frå Fitjar Idrettslag og Kulturhuset sjå tilbake på eit perfekt arrangement, som blei avvikla nesten 100 % etter tidsplanen. Då siste kampen – finalen i eliteklassen for menn – blei blåst av laurdag ettermiddag, var dei ti minutt etter skjemaet. Det skuldast at det måtte fleire straffesparkkonkurransar til for å få avgjort alle kampane.

– Med 59 spelte kampar i løpet av to dagar er det ingen ting å seia på det! seier ein fornøgd Ole Bergesen etter at siste finalen var ferdig klokka 17.10 laurdag ettermiddag.

Både Ole Bergesen og arrangementskomiteen frå Fitjar Idrettslag – Åsmund Sørfonn, Torbjørn Korsvik, Leif Tore Aarland, Sondre Aarland, Jan Åge Tislevoll, Stein Gunnar Halleråker, Birte Steinsland, Thomas Waage og Emil Sørfonn – har all grunn til gratulera kvarandre med eit vel gjennomført arrangement. 23 lag er litt færre enn tidlegare år, men det blei vist mykje god fotball, og ingen stygge skadar.

Ungdommen har teke over dameklassen

Spreke damer i 40-50-årsalderen heng framleis godt med, og i bronsefinalen fekk me sjå eit av høgdepunkta under helgas cup.

Dei gamle travarane Rødhette og Ulvane sleit med dei noko yngre Powerpuffjentene, men i siste sekund gav Anne Helene Vestbøstad veteranane 2-1 og ein yttarst kjærkomen bronsemedalje!

Finalen blei endå jamnare; her møttest to unge lag med spelarar frå det gode jentelaget til Fitjar IL, forsterka med jenter frå nabokommunane våre. Hvite Gutter såg ut til å gå mot siger, men i sluttsekunda utlikna Snakkes, og kampen gjekk «Golden goal». Etter fem mållause minutt måtte finalen avgjerast på straffekonkurranse.

- Annonse -

Her viste keeper Rebekka H. Tverborgvik og lagvenninnene hennar seg litt stødigare enn Snakkes, og kunne til slutt sleppa jubelen laus. Litt ekstra jubel blei det for keeper og lagleiar Rebekka, som også fekk utmerking for beste spelar i finalen.

Open klasse med beste spelaren i turneringa?

I finalen open klasse møttest J14 og Suja Team, ei sjarmerande samling spelarar frå Somalia, Eritrea, Sudan, Irak, Palestina og Zimbabwe. Og innvandrarlaget mønstra fleire av dei beste spelarane me såg i idrettshallen vår denne helga.

Med tre mål var Wilad frå Zimbabwe hovudmannen bak den klare finalesigeren til Suja Team over J14. Foto: Kjetil Rydland.

Best av dei alle var nok Wilad frå Zimbabwe, som scora tre mål i finalen, og bidrog til at Suja Team vann så klart som 4-1. Han imponerte med finslepen teknikk og – til liks med resten av laget sitt – med speleglede og stor innsats.

Dei glade gutane fortel at dei trenar saman i Rackethallen og på Langeland skule. Og truleg er dei endå betre til neste år!

Rykket fra Peru suverene i elitefinalen

Loke Losnegård frå Stord hadde teke av seg lua, og hjelpte eit kobbel gamle og nye A-lagsspelarar frå Fitjar til siger i eliteklassen.

Leif og kompisane var sjanselause i finalen, og måtte sjå Rykket fra Peru vinna så klart som 6-1 etter scoringar av nemnde Losnegård, Torbjørn Korsvik, Jonas Tislevoll og Tormod Tørnquist.

Dermed kunne veterankeeper Oddgeir Træet og dei unge medspelarane hans sleppa jubelen laus.

Det same kunne kunne Ole Bergesen og medhjelparane hans, etter ei kjekk helg i idrettshallen. Og cupgeneralen kunne slå fast:

– Dette var fantastisk; alt gjekk knirkefritt!