Neste gong du kjem inn i foajeen på kulturhuset i Fitjar, kan du ikkje unngå å leggja merke til det store, flotte biletteppet som heng på veggen inn mot kultursalen. 

Teppet er laga av Kari Ivarsøy, og vart avduka tysdag 15. mai ved ei enkel tilstelling.

Kari seier at ho heilt frå kulturhuset var nytt, har hatt lyst til å laga ein vevnad som kunne henga i foajeen.  Etter å ha sett eit bilete i fargane blått, lilla og raudt  fekk ho inspirasjonen til teppet, som ho gjerne vil kalla ”Ei hylling til Fitjar”.  Ho assosierer fargane med den raude solnedgangen, den blømande lilla lyngen og det blå havet, og seier at ”ingen stader er solnedgongen så fin som i Fitjarøyane”.   Det er elles ein komposisjon som gjev den einskilde fridom til å bruka sin eigen fantasi – til å laga sine eigne tankar kring den.

Veven er heile 4,5 m lang og vevd i kypert, og arbeidet er gjort  på etterjulsvinteren.  Mønsteret har blitt til etter kvart som ho har vevd.

Det er med glede vi tek imot teppet, som er ei flott utsmykking i foajeen – der veggane lenge har vore tomme, seier Agnar Aarskog  under innviinga.