A-laget til Fitjar tapte også den andre KM-kampen, og måtte sjå Norheimsund jubla for kretsmeistertittelen søndag kveld.

Etter tap mot Gneist i den første KM-kampen midt i veka, måtte Fitjar scora mange mål mot Norheimsund i dag for å bli kretsmeister. Dessverre uteblei den nødvendige målfesten, og Fitjar blei sist i sluttspelet.

Dei begynte godt, og heimelaget hadde fleire store sjansar i byrjinga av kampen. Etter 10 minutts spel heada Jan Åge Tislevoll rett over mål. Men trass i fleire gode forsøk frå Fitjar, var det Norheimsund som scora først, då Jørgen Langeland sende i veg eit litt mislykka skot frå vel 25 meter. Fitjar-keeper Oddgeir Træet stod for langt ute, og ballen gjekk over han og i mål. Ei heldig scoring, som skulle visa seg å blei den einaste i kampen.

Men det mangla ikkje på sjansar, verken for heimelaget eller gjestene. Både Thomas V. Waage og Jan Åge Tislevoll var gjennom gong på gong. I andre omgang burde det så avgjort ha blitt scoringar. Spesielt på det flotte innlegget frå Jan Åge til Thomas, som ikkje klarte å heada i mål frå fem meter. Også Henrik Raunholm Kjelling var farleg frampå fleire gonger. Og Bernt-Ove Maraas skaut rett utanfor stolperota frå 30 meters hald.

Den fartsfylte kmapen enda altså 0-1, men det kunne like gjerne blitt 5-5. Norheimsund viste seg – ikkje uventa – som eit av dei beste laga Fitjar har møtt i år. Dei hadde stort tempo på ballen, og hadde overtaket i delar av kampen. Men heimelaget spelte ein bra kamp, og hadde dei fleste sjansane. Dessverre var dei ikkje effektive framfor mål, ikkje berre fordi gjestene hadde ein bra keeper.

Kampen gjekk i eit litt høgare tempo enn Fitjar-gutane er vane med frå 5. divisjon. Dette er nok ein forsmak på kva som møter dei til neste år. Dei heldt bra følgje med Norheimsund, men må bli tøffare i duellane. No bør dei ta denne erfaringa med seg inn i vinterdvalen og møta betre rusta til neste sesong.