Open dag ved Fitjar Vidaregåande Skule var ikkje berre ei framsyning av kva elevane får til på skulen. Det var òg ein dag med mykje artig for dei små. Ikkje minst var det gøy å få vera med på skikkeleg prinsessebryllup, då Prinsessa gifta seg med ingen ringare enn Pelle Pirat. Ein plass var det ”ansiktsmaling”, og på Teikning, form og farge  kunne dei minste få prøva seg som kunstnarar sjølv, med staffeli og det heile. To av dei som prøvde seg var Ingvild Mathiesen (7) og systera Anne (4). –Spennande, syntest dei. Faktisk så spennande at pappa Søyland beint fram lurte på om han måtte til å skaffe seg eit staffeli til heimebruk òg, så dei kunne utøve kunsten vidare.
 

I mattetimane hadde elevane på Fitjar Vidaregåande hatt eit peparkakehus-mini-prosjekt der elevane måtte jobba både med målestokk, og arealutrekning i samband med bygginga. Og flotte kakehus vart det. På hjelpepleiarlinja jobba Elin Eidet og Lillianne Drønen Jæger med forflytting av pasient ( Karoline Tranøy Landa), samstundes som dei heile tida prøvde å oppmuntra pasienten – og mykje anna var det å sjå, over heile huset.

 

Elles bugna dei av godsaker frå elevar på matlinja som har starta elevbedrift, men denne sida av Fitjar Vidaregåande Skule, vil folk få sjå meir til om fjorten dagar. Då skipar elevane til julemesse med sal av eigne produkt.

 

Alt i alt ein triveleg open skuledag i år òg. Og svært mange, både frå Fitjar og Stord tok turen innom, dei timane skulen hadde ope, laurdag.