Stor jubel i Fitjar kultur- og idrettsbygg laurdag kveld under finalen i årets revyfestival «Berre Galskap», og eit utskjemt Fitjar-publikum fekk mykje å gle seg over.

Etter kvalifiseringsrundar med deltakarar frå Tromsø i nord til Jæren i sør, fekk ein fullsett kultursal presentert 20 revynummer laurdag kveld. Og høgdepunkta stod i kø, noko publikum visste å setja pris på. Sjølv om dei er veldig godt vane frå sommarevyane på Fitjar Fjordhotell.

Ein fornøgd jury fekk ingen enkel jobb med å blinka ut dei beste artistane. Men Knut Øyvind Markhus frå Stord, Kurt Inge Larsen frå Bømlo og Hanne Sagmo frå Norsk Revyfaglig Senter lét vel over at dei hadde vore samstemte i sine avgjerdsler.

Publikumsprisen gjekk til den artisten som klarte å få høgast jubel i salen, målt i decibel. Den gjekk til Marion Zahl frå Søral-revyen med nummeret «Ein gong når eg blir sexy». Beste monolog blei Roy Aron Myklebust frå Myklebust Komikkment med nummeret «Ole Johnny». Ein rett triveleg sunnmørsbonde. Her glei poenga ifølgje juryen over i kvarandre utan å gå over grensa. Det er ikkje vanskeleg å vera einig med juryen i dette. I den musikalske kategorien gjekk Sotra Teaterlag av med sigeren med sin hyllest til Sotra. Ifølgje juryen fekk dei fire damene Anita Vindenes, Trine Sundsbø, Grethe Alvær og Anita Rugland folk til å slappa av med den fleirstemte songen sin. Beste sketsj blei EDD frå Fjåge fjes. Øyvind Brunvær og Trond Dahl fekk prisen for godt ordspel og godt samspel. Årets nykomling blei Arve Stangeland frå tesaterlaget Blå resept frå Klepp på Jæren med den sjølvskrivne teksten i nummeret «Hallo».

Mediehuset Sunnhordland hadde sett opp ein eigen pris på 4000 kr for beste revytekst. Den gjekk til Hildegunn Otterstad frå Bygstadrevyen med teksten «(S)liten». Ifølgje juryen rørte den ved aktuelle tema og rørte hjarta. NRS-prisen – ein eigen pris frå Norsk Revyfaglig Senter – gjekk til Anne Marith Sandhåland. Juryens fripris gjekk til Fitjar Revylag med nummeret «Grillmedley». Petter Aagård, Anne Marit Sandhåland, Ole André Westerheim, Ole Bergesen og Terje Træet. Siste prisen som blei delt ut, gjekk til Anne Marith Sandhåland. Med nummeret «Sjukepleiaren» blei ho direkte kvalifisert til NM i revy på Høylandet i 2011.

Me kan vera samde med både det takknemlege publikummet og juryen over at her var mykje å gle seg over. Heldigvis slapp me unna både overdriven banning og underbuksehumor. Og nivået var bra, sjølv om høgdepunkta sit minst like tett under sommarrevyane på Fitjar Fjordhotell. Og dei tre timane framsyninga varte, gjekk iallfall lynande fort. Det er eit godt teikn.