Enno ein gong var husflidmessa eit vitne om mykje god lokal kreativitet. Det er vel verdt å ta turen til Fitjartun i helga.

Turid Hovland kan ikkje seie nøyaktig kva nummer i rekkja årets julemesse er, men at det er ein stad mellom 20 og 30 år stemmer nok. Men at det var 24 utstillarar frå Fitjar, Stord, Bømlo – og Karmøy, kunne ho fortelje. Dama som hadde teke turen heilt frå Karmøy heiter Lillian Haaland. Ho har òg vore her tidlegare år og tilbyr fitjarbuen mellom anna bilde, diktbok og halsband av ekte stein. 

Bjørg Strømme var på plass med fiskeskinnsprodukt, Alma Kjærland med glasenglar – og det var elles flotte tova, strikka og sydde produkt å sjå i lokalet. Gode julegåveidear, spør du oss. Stressar du med julebaksten, kan du kjøpa julekjeks òg.

Me fann elles både nye bøker og forfattarar. Magnus Stokken hadde fått laga lydbok av den første boka si, Steinar Hystad var på plass med ny bok frå lygarbenken, og, ikkje minst, fann me Aud Jorunn Bjørlykke, som har laga bok om Fitjar prestegard og miljøet omkring.

Elles var det som vanleg lynutlodding til inntekt for barnheimen i Bobrinetz i Ukraina.