Eit lite knippe soknebarn hadde funne vegen til Fitjar kyrkje for å høyra på Osternes mannskor tidleg søndag morgon.

Som kjent er Osternes mannskor i Trondheim denne helga for å vera med i det store koret som framfører salmeboka minutt for minutt.

Seks kvinner og ei kyrkjeverje hadde funne vegen til Fitjar kyrkje då turen var komen til det lokale mannskoret vårt, klokka 07.35 søndag morgon, litt før den annonserte tida.

Direkte frå Vår Frue kirke i Trondheim fekk me høyra den velkjende lyden av Osternes mannskor og sjå dei lokale heltane våre på storskjerm i kyrkja.

Først fekk me høyra salme nr. 559 «I dag på apostolisk vis», og etter kvart kom salmane frå nr. 662 til 669 på løpande band. «Med kall fra Gud og Kirken», «Kom, du Guds kjærleik, kom», «Å leva, det er å elska», Kvardagskristen vil eg vera», «Guds sønn steg ned å tjene» og «Soli har sitt same lag» gav den vesle tilhøyrarskaren i kyrkja ei ugløymande, historisk høgtidsstund.

Før Osternes mannskor var ferdig, etter ein liten halvtime, talde forsamlinga i Fitjar-kyrkja 12 morgonfriske salmeelskarar, som avslutta samværet med ein betre frukost. Enkelte blei att i kyrkja for å høyra opptak av Osternes mannskor sin innsats i Vår Frue kirke i Trondheim i natt.

Kyrkjeverje Harald Rydland er som kjent ein dugande musikant. Han seier at mannskoret kom flott frå innsatsen i Trondheim. Harald fortel elles at kyrkja blir open i dag heilt fram til klokka 17 i ettermiddag. Då blir kyrkja stengt for å gjerast klar til lysmessa med konfirmantane. Den startar klokka 19 i kveld.

Ingressbilete: Kjende andlet på storskjerm frå Vår Frue kirke i Trondheim. Foto: Kjetil Rydland.